Mel. 132 d.
Ill.
1.
Nertordlerutigilavut
uvloĸ tâmna õmamut!
Sâlaĸartoĸ nertorlavut,
ullapirsarmattigut!
Atâtab saimarsaivlune
tillingmago anernine
inuĸotiminulle.
Lit.
Sillaĸsoarmiut illũnatik Nâlegaĸ iggiaĸomijarvigilitsuk; illagêt ivsornaititaujut nakorilitsuk! Kujagidlarsiuk tatamnartulliningillo tamaita oĸautigisigik! Kia Nâlekab piniarnersoangit nâvlugit oĸautigijungnarĸagît, nakorijungnarlugo nertornarninga tamât?
Mel. 199.
Ill.
2.
Gûb Erninga nertortaule,
atâtamut ailaungmat,
uvaptingnullo ĸilangme
nekoĸsitiksarsingmat.
Nâpkigijaunipta
nellunaikutanga
Gûdib anerninga
tillikliutivâ
inôseĸartitsijoĸ.
Lit.
Kilait, kussileritse pângat nuvujanillo idluarnermik ĸorlortoĸarle! Nuna aitarle, piulijaujutiksarnik annititsivlune. Igvit, Nâlegaĸ, pingortipat. Gûde, inuĸotitit sivulerlugit sunaĸajuitokut ingergalauravit, tagva nuna sajukpilulaukpoĸ ĸilaillo kussilauĸput Sinailo sajukpilulauĸpoĸ Nâlekab Israêlitit Gûdigijangata sângane.
Mãnale, Gûde, saimanartunik kovisivotit sillaluktut kingormgutijatillo nukkingerutisimajut nukkiksarpattit, inôseĸartillugit Gûdemit pijomik, pattangajullo nekoĸsitipattit pitsiarnernut.
Mel. 151 g.
Ill.
3.
Pivluta toĸogavit,
takunâlauĸtigut!
Takpângat Anernivit
tupvigilitigut,
õmativut pannertut
saĸĸêlerĸovlugit
mãna idluarnerub
perortitanginik.
Lit.
Nâlegaĸ, ĸilait tatamnartullinit nertoromârpait Gûdiblo mikseĸârninga oĸautigijaujariaĸarpoĸ illagêne ivsornaititaujune.
Mel. 132 d.
Ill.
4.
Nertoritse, Anernerub
uvinik sâlagivâ,
piniarnersoarminut
pitsartutingmattigut,
mãna okpertôĸatigêt
timingit inigingmagit
ivsornaitillugillo.
Mel. 199.
5.
Anerneĸ pitsartudlartoĸ,
inôseĸartitigut,
Satanas kassẽtoĸsoaĸ
sunaĸutiginago
nertulerĸovluta
illerasugata:
piulijaugapta,
Gûdib atâtapta
ĸitorngarivâtigut.
Lit.
Sivorngane ungasiktomẽlauĸpose Kristuseĸalaungitoselo, mãnale ĸannilerpose Kristusib aungagut ivsornaitullo kinguvângoĸatigivâse, Gûdiblo iglungane iglomioĸatauvose. Taimaimat attinga ĸujagidlarsiuĸ, piniarningit oĸautigisigik inôĸatigêksuit akkornganne, illipsingnik ĸairĸojijub piniarningit ajungitut, kairĸungmasse ĸaumanerminut tatamnartomut, nunat illũnaita illumertaurĸovlugit tâpsoma nertornarninganik. Illipsingnit oĸangilase, atâtapsele anerningata oĸartipâse. Ahâk, Nâlekab oĸautsit tunivait, oĸautsinik tussarnertunik oĸâlajut unuktoĸsôvut.
Mel. 151 g.
Ill.
6.
Oĸâlajut inungnut
Jêsusib aulapait,
Nâlekab anerningat
illagitsainarpait,
Kristusib naglingninga
nellunairtaulerpoĸ,
nane oĸarangatta,
nakorijaulerpoĸ.
Mel. 132 d.
7.
Nertorsiuk Gûd Anerneĸ!
inuit, nertorsiuk!
Davidib imgerutingit,
Apostelit oĸausingit
inungnut illagingmagit,
õmatingit kibliklugit.
Oma kibliklitigut!
Lit.
Upkoaĸsuit upkuersigik, inôĸatigêt idluartitaumajut okpernermiglo ivlersijut itterungnarĸovlugit. Nâlegaĸ nertorsiuk imgerluselo: Iglugasaksoaĸarpogut aulajungnangitunik, avalungit sappûlutangillo piulijauviksauvut.
Mel. 199.
Ill.
8.
Omisuktut unudlartut
illagênik kassẽmullo
pinasuartut, Gûb kivgangit
anusingortillugit;
sullitsengilalle,
Gûb Nâlegangata
pitsartutingmagit.
Illũnainut aivut
sâgiarĸojivlutik.
Lit.
Imarbiub imaĸsoangit iktullijâralloarpatta, auladlaralloarpatta aulajâdlarninganullo ĸaĸĸat sajukpiluktitaugalloarpatta, — tagga kôksoaĸ! Kôgarsungita Gûdib iglugasaksoangit ĸuviasuktipait. Gûde tâpkonanẽpoĸ, tamanna pivlugo aulaniatsengilat. Gûdib ikajorpait uvlârarsukut. Halleluja!
Mel. 208 d.
Ill.
9.
Mãnakut illale
nunat illũnatik
ullutjaulârput
sôrlo kôksoarnut
inûlinartunut:
tussarnertunut
Jêsub oĸausinginut.
Uvluksanga tikilerpoĸ
nerriugijavut.
Lit.
Uvlut kingordlingine imaitsomârpoĸ, oĸarpoĸ Nâlegaĸ: Inungnut tamainut anernera kovijomavara, Nâlekablo attinga taivlugo tuksiartoĸ piulijaujomârpoĸ. Nâlegaĸ nakorijaule issoĸangitomit issoĸangitomut illagêktoĸotingillo oĸarlit: Amen, Nâlegaĸ Jêsuse, ĸait!
Mel. —249.
Ill.
10.
Jêsus, ĸailaurittôĸ,
ĸailaurittôĸ!
Amen, ĸailaurittôĸ.
----
VIII. Nertordlerutiksat.
A. Gûdemik
pingasôlijomik.
40.
Mel. 235.
Ill.
1.
Nâlegaĸ Gûdivut,
opigivaptigit.
Nâksaungitoĸ Atâta Gûd,
nakorivâtit sillaĸsûb.
Kor.
Kilangmiugasaksuit
takpâne unuktoĸsuit
Serafillo nertorpâtit,
naggateĸatsengitotit.
Ill.
Hailig Gûd Jehôva,
Gûdivut Jehôva;
hailig Gûd Jehôva.
Jehôva Zebaot.
Okpertullo illũnatik
nuname nakorivâtit,
Atâta ĸilangmẽtotit
ernituallo anernît
tessiorte uvaptingnik
apĸomut mikseĸârtomut. Amen.
Mel. —208d.
Kor.
2.
Gûdele, ajortogut
takunârtigut, naglimut
ĸitorngarivluta.
Lit.
Nâlegapta Jêsusib Kristusib atâtanga sêrĸortorvigivavut, atâtaujotôjoĸ tamainut ĸitornganik taijaujunut ĸilangmelo nunamelo, tâpsomunga tunidjiviorĸovluta pitsartunermik ânanauningata amigangidlarninga malliklugo sangijôtitauvluta anerninganut illuptigut, okpernermut Kristuse inneĸarĸovlugo õmatiptingne, amâtsiortaulerĸovluta tunganilijaulerĸovlutalo naglingnerme.
Mel. 97.
Ill.
3.
Jêsusipta Atâtanga,
atâtagigaptigittauĸ,
ernit toĸongmat pivluta,
aungmut pissiarivluta
ĸitorngautingmattigut illingnut;
ĸujagivaptigit opigomut.
Mel. 125.
4.
Illagêt atâtangat
ĸotsiktomẽtotit,
ĸailaule nâlegaunît,
inugasaksuit
akkiksaulerĸovlugit
toĸotigilaungmagit
nagliktub ernerpit.
Mel. 110.
5.
Atâtâk, amuanga ernernut,
ernivit pitilinga illingnut,
anernît illumnẽnarlaurle,
issumamnik aulatsitsainarle,
ullapirsaumik Gûmit pijomik
õmatimne peĸainarĸovlunga!
Mel. —208d.
Kor.
6.
Unuktut amuakkit
uvaptitut, Jêsusemut
perĸutautillugit.
Lit.
Tarnime siorniorninga pivlugo nãmaksititaunerminik takojomârpoĸ illitarsinermullo kivgama tâpsoma idluartotôjub unuktoĸsuit idluarsititsomârpait, ajorningit pêjaramigit.
Mel. 97.
Ill.
7.
Gûb saugârsunga toĸotaĸ.
inuit tamaitaĸsuit
piksarivattit kissivit
uvagullo, toĸogavit,
toĸungnut pilloriktinaptigut,
pigivluta saputingmitigut!
Mel. 125.
8.
Tarnimnit annitikit
uvingub issumangit,
annerosuktillunga
illingnik, Jêsuse,
inôniarĸovlunga
nakorijarnut mâne,
piulijaugama.
Mel. —208d.
Kor.
9.
Kissivit nâleklutit
inôniaromavogut,
Jêsuse, illingnut.
Lit.
Kristusib tamaita toĸotigivait, inôjut kingorngane nangminermingnut inôniarĸonagit tâpsomungale pivlugit toĸolauĸtomut makkisimangmijomullo.
Mel. 97.
Ill.
10.
Gûd Anerneĸ, opigomut
tamapta nertorpaptigit,
pitiluta Jêsusemut
okpertungortinaptigut.
Tâpsoma ĸuviagijanganut
inôrĸovluta, âĸingmitigut!
Mel. 125.
11.
Kajungertitsinernut
Jêsub naglingninga
pititsuk tarniptingnut!
Tagva naglikpavut
mâne inôtilluta,
arvertatsainarluta
idluarijarnut.
Mel. —208d.
Kor.
12.
Kissiat pitsartunit
âĸigutigivavulle
tettigẽnarlutit.
Lit.
Nâlegapta Jêsusib Kristusib nangmineĸ Gûdiptalo atâtapta, uvaptingnik nagligosuktub, saimarsainerminullo manigornartomik nâksaungitomik nerriugijaksamiglo ajungitomik tunidsivigilauramitigut, tâpsoma õmatise ĸaiblarligit nekoĸsitiluselo ajoĸertûtseme piniarnernelo tamaine ajungitune!
Mel. —235.
Ill.
13.
Tamapta Amenẽrpogut.
Gûdib illagivâtigut.
Gûde Atâta Ernerlo
Anernerlo nertortaule! Amen!
----
41.
Mel. 132 d.
Kor.
1.
Nakorijartudlarsiuk
Nâlegaĸ Gûd õmamut!
Oĸautigijartorsiuk
nertornartoĸ! Tamainut
pitsiarninga attorpoĸ,
pingortitaujut pairivait
tarnivullo saimarpait.
Lit.
Nertortaule Gûde, Nâlegapta Jêsusib Kristusib atâtanga, annerilaungmattigut tâpsomûna sillaĸsoaĸ tunganilijaurĸârtinago, piulilaungmattigut tâĸtub pitsartuninganit nuktertilutalo ernerme erdligijarme nâlegauvinganut saimausilaungmattigullo anernelingnut saimanartunut sunatuinarnut, ĸilaub pinginik illangiutitiluta Kristuseme. Tâpsomûnatauĸ, okpililaurapta, Anernermik ajunginermik naĸĸitjusertaulauĸpogut. Tâmna kingormgutijaksaptingnut nellunaikutarivavut inuĸotingita piulijauviksangat tikidlugo, ânanauninga nertortaurĸovlugo.
Mel. 228.
Ill.
2.
Halleluja, nâleklugo
nertoriartulavulle
Gûde pingortitsijoĸ
issoĸangitoĸsoarmut!
Kujalivigidlarlavut
avagosuktotôjoĸ!
Attê, Gûde Nâlegaujoĸ
ivsornaitoĸ opigilavut,
õmamut ĸujagilavut!
Mel. 14.
Ang.
3.
Omatimnik ĸaitsivunga
illingnut, Gûdiga,
Arn.
ikpigitinamga igvit,
tâmna tunivlugo.
Ill.
4.
Illa ivsornartoĸsôjoĸ
mamaitoĸsôjorlo,
igvit âĸiksulauruktôĸ
idluarijarnut!
Lit.
Kaujimaleritse, nunguniartomut silberemullõnêt goldemullõnêt piulijaunginapse piusikullupsingnit atâtanut adsiunipsingnit, Kristusible aunganut erdlingnartomut saugârsutut sinaungajuitotut ivsornaitotullo ilauĸtub.
Mel. 228.
Kor.
5.
Halleluja, nakudlartub
Gûb erningat toĸotaujub
annerilaungmattigut;
aungmut pissiaringmattigut,
serparsarlugit tarnivut,
ĸitorngaringmattigut.
Ill.
Tagva illa inôviksaĸ
pilloringneĸ pigijavut,
illagêkapta aunganut.
Mel. 14.
6.
Jêsuse, tagva piginga
ubvarlunga aungnut,
toĸogavillo pivlunga
inuillo pivlugit.
7.
Okpernekitub tarnima
tiguliuk aggut!
Nekoĸsiuk, ajornikka
pêjarangne aungnut!
Lit.
Gûdib nerriuktitsijub illumertilise tamainik ĸuviasungnermiglo ullapirsaumiglo okpernermut, nerriugijaksaĸammarerĸovluse Anernerub ajunginerub pitsartuninganut!
Mel. 228.
Kor.
8.
Halleluja, Gûd Anerneĸ.
mãna soraijuitomik
nertudlarlaptigille,
erniangotinaptigut
pitiluta Jêsusemut
anneridlartiptingnut.
Ill.
Illa tagva ĸuvianaĸ
pilloringnaĸ, tarniptingnut
piksarivavut nellâgut.
Mel. 14.
Arn.
9.
Gûd Anerneĸ, uvangatauĸ
innigilaungminga,
Ang.
Jêsusib naglingningata
kibliktautilinga!
Ill.
10.
Illa õmatiga piuk,
nâlekvigilitit;
innigitsainadlarmiuk
issoĸangitomut!
Lit.
Tâmnale illipsingnik saputsijungnartoĸ, passijaksaunase pidlaraksaunaselo saĸĸertitsijungnartoĸ illipsingnik ĸuviasukluse, Gûde tâmna sillatojotôjoĸ, piulijivut nertortaunermik pile opigijaunermiglo pitsartunermiglo ajugaĸanginermiglo mãna issoĸangitoĸsoarmullo. Amen.
Mel. 146.
Ill.
11.
Nâlegaĸ ômajoĸ,
Gûdiga nertortaule
nakorẽnartaujoĸ
pingortisimajunut!
Ivsornaitoĸsôjoĸ:
Gûde Atâtaujoĸ,
Gûd Erneĸ, Anerneĸ
opigijaudlarle!
Mel. 228.
Kor.
12.
Halleluja, nâleklugo
Gûdivut nertorlavulle
attingalo õmamut!
Ill.
Kilangmiut illagivlugit
imgertatôĸ nertornaumik
ĸuviagilavullo:
Hailig, hailig, hailig
Gûde Nâlegavut, Gûd Zebaot
nakoritsainadlalavut!
----
42.
Mel. 132 d.
Ill.
1.
Gûde nakoridlarlavut,
atâta saimarsaijoĸ,
tatamnartullitsainartoĸ,
Gûd ullapirsartivut!
Manigutsainarmattigut,
pêjarmagit kiksarnivut,
Gûdivut nertorlavut!
Lit.
Halleluja! Nâlegaĸ nertorsiuk ivsornaitoviĸotingane, nertorsiuk aulangitoĸotingane sôngojome! Nertorsiuk piniarnersoangit pivlugit, nertorsiuk ânanaunersoanga malliklugo! Illũnatik anerniggit Nâlegaĸ nertorlitsuk!
Mel. 132 d.
Ill.
2.
Pakkoa nakoridlarpât
Engelit pitsartujut,
mâne ĸujagidlarivât
okpertut nunamẽtut.
Tamapta nakorilavut!
Anerniggillo inôjut
attinga nertorlitsuk!
Mel. 11.
Ang.
3.
Kilak, nuna imarlo
nertordlerput illingnik,
taimak tarnima, Gûde,
nertutsainarlitille!
Arn.
4.
Gûde, mallungnartomik
tarnima missigivâtit,
kinaunernik kinaunimnik
erĸaititsainarminga!
Mel. 214.
Ill.
5.
Atâtâk, tunitjijotit
ernernik naglingnermut,
Kristus, toĸotaumajotit
pivluta, Gûb sauganga,
Anerneĸ, tarnekullungnik
manigornidlartotit,
illa, ivsornaitotit,
õmamut nertorpaptigit.
Gûb nagligosungninga
nungusuipoĸ illa.
Mel. 416.
6.
Tattamnartitsijub Gûb attinga
inôjose, nertorsiuk!
Attê, tamapse nertornautinga
unipkautigẽnarsiuk!
Atâta, Erneĸ, Anerneĸ
opigijartudlarsiuk!
Halleluja, Halleluja!
Mel. 106 c.
7.
Opigivaptigit, Atâtâk,
tarniptigut timiptigut
ĸitorngarivluta, ĸujanaĸ!
kingormgujerĸogaptigut,
nertortaugit uvaptingnut
mãna issoĸangitomut!
Lit.
Inornarmêk Gûdib akluitoĸsôningata ittininga tamangnik: sillatujoĸsônermik nellotuitoĸsônermiglo! Illa, tâpsoma kajusimaningit tukkisijaujungnangilat apĸutingillo nautsertortaujungnaratik! Tâpsomangat tâpsomûnalo tâpsomungalo illũnamatsiatik ingmatta. Tãmna nertortaudlarle issoĸangitomut. Amen.
Mel. 106 c.
Ill.
8.
Jêsusiga, nakorivagit,
ikajoriartoramga,
naglimut âniadlaravit
pivlunga, piuligamga
Satanasib agganginit,
perĸutigigamga igvit.
Lit.
Kristusib nagligilauĸpâtigut ubvarlutalo ajorniptingnit aungminut. Attanivingortillutalo ajoĸertuijungortilauĸpâtigut Gûdemut atâtaminullo. Tâmna nertortaule ajugaunerovlunelo issoĸangitomit issoĸangitomut. Amen.
Mel. 106 c.
Ill.
9.
Anerneĸ Gûd, manigoramga,
nakorijaudlarit mãna,
taimaktauĸ ĸaujimatinamga,
inôtsemut nukterama.
Kuvianartut kissivit
uvamne pingortipattit.
Lit.
Ijib attautsiblõnêt takolaungitanga siutiblo attautsiblõnêt tussalaungitanga inûblo attautsiblõnêt õmatingata issumagilaungitanga, tamanna Gûdib âĸiksulauĸpâ nagliktiminut. Uvaptingnulle Gûdib nellonairtilauĸpâ anernerminut. Mãna ĸemergovogut sôrlo tachartûtikut erginaisiorluta pijomârtomele kenarmit kênarmut.
Mel. 101.
Ill.
10.
Gûde, nakorivaptigit.
Nertorlugo attit angijoĸ
imgervigidlarpaptigit,
Atâta, Erneĸ Anernerlo,
Gûdetôjoĸ ivsornaitoĸsoaĸ
uvaguttauĸ Gûdigigaptigo.
Mel. 10.
11.
Atâta ĸotsiktome,
Erneĸtauĸ nertortaule!
Anerneĸ uvaptingne
inneĸainarle! Amen.
----
B. Atâtamik.
43.
Mel. 235.
Ill.
1.
Gûd, nertorpaptigit,
Abbamik taivlutit;
atâtagidlaraptigit,
ĸitorngavit nâlekpâtit.
Kor.
Engelillo ĸilangmiut
ĸujalẽnartut ernernik
Kerubillo Serafillo
nippersoarmut nertorpâtit:
Ill.
Hailig Atâta Gûd,
Nâlegaĸ Zebaot!
Abba, Gûd, Gûdivut
Jêsub toĸunganut!
Kilangmut ittersimajut
ittigangnut pâmakterput;
illagivlugit, Jehova,
sângne sêrĸortorpogulle.
Nakoridlarivaptigit,
ĸitorngaugapta illingnut. Amen.
Lit.
Imâk Gûdib sillaĸsoarmiut nagligivait ernituane tunivlugo, illũnatik okpertut tâpsomunga assiorĸonagit nungusuitomigle inôguteĸarĸovlugit.
Naglingneĸ tamadja: uvagut Gûde nagligigaptigoungitoĸ, tâpsomale naglingmattigut erninelo tillilaungmago, ullapirsautaurĸovlugo ajornivut pivlugit.
Mel. 214.
Ill.
2.
Ernine ivlerinago
Gûb tunivâ pivlunga,
aunganut piulivlunga
pidlartaujutiksamnit.
Nellâgulle saimaninga
ipaksinatsengitoĸ,
uvamnut inornartoĸ
ĸujalijutigivara.
Gûb nagligivâtigut
issoĸatsengitomut.
Mel. 106 c.
3.
Opinaĸ Gûdib saimaninga,
itsarnit aneringmanga,
âĸiktaungmat nâlegauvinga
tagvungalo pitimanga,
aglangmanga naglingnermut
aglangnut ômanartunut.
Lit.
Nertortaule Gûde, Nâlegapta Jêsusib Kristusib atâtanga, annerilaungmattigut tâpsomûna sillaĸsoaĸ tunganilijaurĸârtinago, piulilaungmattigut tâĸtub pitsartuninganit nuktertilutalo ernerme erdligijame nâlegauvinganut, saimausilaungmattigut anernelingnut saimanartunut sunatuinarnut, ĸilaub pinginik illangiutitiluta Kristuseme, pijungnartilaungmatigut ivsornaitut kingormgujiĸatigivlugit ĸaumajome, saimarsautinga ânanaujoĸ nertortaurĸovlugo.
Kemergotitse, ĸanoĸ angijomik naglingnermik Atâta saĸĸijârtitsilaungmat uvaptingnut, Gûdib ĸitornganginik taijaurĸogamitigut!
Mel. 214.
Ill.
4.
Mãna ĸuviasungnermut
atâtaptingnut pita!
Najorninganẽtutitut
ôlavut naglingninga!
Nertorsiuk, Halleluja!
Gûdib piulijipta
naglingniktoĸsôninga
nertordlerutigilavut,
inuĸotiksaminut
annerilaungmattigut.
Mel. 70.
Kor.
5.
Attê, tamapse
Gûdib saimaninga
ĸujalivluse
nertorsiuk illa!
Saimaneruiut ĸairĸudlarmasse
ingminut, ĸuviasudlaritse!
Mel. 151 g.
Ill.
6.
Saimaneĸ inornarmêk!
Kujalimut tagva
uvamnik, pigijamnik
tunidjilerpunga
Gûdemut; aulatsile
illingalârnimnik,
idluarijaminut
tessiulârmanga.
Lit.
Gûdib saimanartunik tamainik perĸutitaliksûb, uvaptingnik ĸairĸojijub ânanaunersoarminut issoĸangitomut Kristuse Jêsusekut, tâpsoma nangmineĸ âĸiksulitigut nãmaktomik nekoĸsitilutalo pitsartutilutalo tunganilitilutalo!
Mel. 151 g.
Kor.
7.
Manakasakut illa
angerarviksavut
atâtamut takpaunga
nelliutilârpoĸ;
pânẽtut idluartut
illagilârpavut
merngoerserviptingne.
Kuvianadlarmêk!
Mel. 214.
Ill.
8.
Gûdib naglingninga taimak
nungusuitotôngmat,
tuksiarpagit, Atâtâk:
tunidjiviolanga,
pitsartunimnut tamainut
erĸitsomadlarapkit,
uvluksamne tamaine
inôjungnairĸârtinanga.
Pâne ungagivlutit
nakorẽnalârpagit.
----
44.
Mel. 61.
Kor.
1.
Nâlegaĸ nâlengnartoĸsoaĸ nertulauruktôĸ,
tarnîk, tamanna õmamut tussugidlarpara.
Ill.
Kailaurittôĸ,
ĸujalidlarlutillo
sagvairit opigungnernik!
Mel. 14.
2.
Omamut nellâgôrtomut
nakorivaptigit,
Gûde. Nertordlerutivut
sillab tussarligit!
3.
Inuk sunauvâ, Gûd, sângne,
taimak erĸarangne?
sumiglo piksaĸarĸitâ,
pillingikuptigut?
Mel. 132 d.
4.
Pitsartunit, sillatunit,
aulatsijoĸ tamainik,
naglingnit erĸaumagapkit,
pairĸsidlartoĸ tamainik,
illingnik nertordlerlunga
nãmaktomik ajorpunga,
Atâtaga, Gûdiga!
Lit.
Inuk sunauvâ, taimak issumagigangne, inûblo erninga, taimak pairigangne. Nâlegaĸ, piniarnitit angijovaksôvut illa unudlartoĸsôvlutiglo. Illũnaita sillatuvlutit âĸiksulauĸpattit nunalo nâmavoĸ perĸutingnik. Arloritse takovluselo! Kina makkoninga pingortitsivâ? anitsijoĸ unurninginik, kittilugit attingillo taivlugit, ajugaĸangitoĸsôngmat pitsartujoĸsôvlunelo; saĸĸijângitoĸangilaĸ attautsemiglõnêt.
Mel. 61
Kor.
5.
Nertortaule Gûd sillaĸsoarmik aulatsijoĸ
nagligosungnerminullo tamainik pairĸsijoĸ,
illũnainik
pijariaĸartunik
pillitsivigẽnarlutit.
Mel. 14.
Arn.
6.
Kilangmik issivitsijoĸ
ĸolliptingne kina?
Ang.
sillalungmik aulatsijoĸ,
seĸinermik kina?
Ill.
7.
Piksaptingnik tunitjijoĸ
uvaptingnut kina?
sillarnerluksiorupta
sernârtorle kina?
Mel. 132 d.
8.
Illũnâne takovakka
tatamnartullinitit,
ĸilait unipkautigivât,
Nâlegaĸ, opinarnit;
nuvujanut ĸotsiktunut
tôrpoĸ, Gûdeviksoavut,
angijoĸ pitsiarnit.
Lit.
Nâlegavut angijôvoĸ pitsartujoĸsôvlunelo, sillatuningalo ôktortaujungnatsangilaĸ. Nellekârluse Nâlegaĸ ĸujagivlugo imgervigisiuk, Gûdivut nipliajorvigisiuk harfinut. Kilangmik ulliksijoĸ nuvujanut sillalungmiglo âĸiksoijoĸ nunamut, iviksukkanik perorsatitsijoĸ ĸaĸĸane, ômajunik nerĸiksaĸartitsijoĸ, tullugârĸanik nipliajunik tâpsomunga. Gûdib puilaviarsunga imeĸarpoĸ nãmamariktomik.
Mel. 61.
Kor.
9.
Nertortaule Gûd pingortitsijok uvaptingnik,
pitsartutingmattigut tessiungmattigullo,
ullikluta
serngnigidlarmattigut
ĸanoetitaurĸôrupta.
Mel. 14.
Arn.
10.
Ajungitunik tamainik
illingnit pivogut;
Ang.
serngnigijigigaptigit
sivôrangilagut.
Ill.
11.
Pattangaitẽnarpaptigut
nunamẽtilluta,
ikajutsainarpaptigut
nangiartilluta.
Lit.
Nâlegaĸ saimarveĸarpoĸ nâpkigosuklunelo ĸenuelunelo pitsiarlunelo angijomik. Nâlegaĸ pitsiarpoĸ illũnainut piniartanelo tamaita nâpkigivait. Illũnatik ijingita miperpâtit, igvillo nerĸiksanginik tunitjivigivattit nelliuningine. Igvit aggaktit issivitipattit anernigillo illũnaita nãmaksitipattit ĸuviasuklutit. Kanerma Nâlekab nertornautâ oĸautigijaksarivâ, uviniggillo illũnatik attinga nertutsainarlitsuk sorairatik.
Mel. 61.
Kor.
12.
Nâlegaĸ nertoruk mãna, pitsartutingmattit
piksaĸartilutillo ĸilangmit naglingnermik;
erĸariuk,
ajugaĸangitôjub
issumagitsainarmattit.
Mel. 14.
Ang.
13.
Gûde aulatsinermine
tamarungnangilaĸ,
Arn.
piniarningit illũnatik
nertornatsainarput.
Ill.
14.
Taimaimat tettigileruk
nunamẽtillutit,
ôma nãmatsainartomik
pairitsainarmattit.
Lit.
Gûdib illagikpattigut, kia akkerartorungnarpâtigut? Tâpsoma ernine aglât ivlerinago tamaptale pivluta tunidlalauramiuk, tâmna illagivluge tamainik tunitjiviginajangilâtigut? Taimaimat issumajârase sumiglõnêt, illũnainigle pijomajapsingnik Gûdemut nellunaijaileritse, tuksiarluselo ĸenuvluselo ĸujalivluselo.
Mel. 61.
Ill.
15.
Nâpkigosuktub attinga nakoridlarlavut,
illũnata tâpsomunga nekoĸsijaujogut,
nertorlavut!
Gûde ĸujagilavut
issoĸangitomut! Amen.
----
45.
Mel. 151 g.
Ill.
1.
Tarnîk, imgitsiarit,
Nâlegaviksoaĸ
aulatsijoĸ tamainik
imgervigivlugo!
Kotsiktoĸ nertorpara
tamâne nuname,
nakorijomavara
anerneĸarnimne.
Mel. 195.
2.
Gûdeviksôjotit
inornadlartotit,
nertordlernivut pigikit!
Nâpkigigaptigut,
tammaĸattarnivut
kamagingitsertorlugit,
uvagut — õmamut
nakorilaptigit
nertutsainarlutit.
Mel. 416.
Kor.
3.
Tarnîk, Nâlegaĸ opigidlaruk!
Opigẽnaromavara.
Nuname sulle arvertarama,
nakorivara Gûdiga.
Tarnemiglo timemiglo
tunitjijoĸ nertortaule!
Halleluja! — Halleluja!
Tarnik Nâlegak nertoruk, illumalo tamât attinga hailigeojoĸ; Tarnik Nâlegak nertoruk, puigorniarnaglo sunamik ajungitullivigilaungmattit. Issumagijungnainiktok ajornernik tamainik; inuliklertorlo Kanoênernik tamainik; Piuliklertoĸ inôsernik asserornermit; niaĸosêjoĸ illingnik, saimarviĸarnermik nâpkiningnermiglo.
Mel. 151 g.
Ang.
4.
Gûb piniarningita
tatamnatsainartut
Arn.
ajugaĸangininga
oĸâlautigivât.
Ill.
Sutairtut sappingilait
piulisârlugit.
Opigivara tagva
inôsimne tamât.
Mel. 195.
5.
Nertortaudlalaurit,
akkilêngitotit
ajornivut malliklugit;
nâpkigosungnermik
attutsainartotit,
tamainik aulatsivlutit.
Gûdele, — ĸaijome
ĸenuersârnermut
nâpkigingmitigut!
Mel. 416.
Kor.
6.
Ijit tautungitut tautuktipait,
nikanartut inûlivait,
ikpigijut pattanganermingnik
naglingnermut erĸilerpait.
Nelleĸangitub Gûdivit
issumagitsainarpâtit.
Halleluja! — Halleluja!
Mel. 151 g.
Ill.
7.
Pitit nagligigangne,
issumagivattit
idluarĸutiksangit,
saimaromavlugit.
Tikiaĸitillugit
idluarijattit
ĸitorngarnut, Atâtâk,
sappitsengilattit.
Mel. 195
Kor.
8.
Ajortokullungmik
aijoĸalerangat
illingnut, nâpkoarivat.
Sângne ĸugviortut
ajortoĸsôningit
issumagijungnairpattit.
Naglimut — ajortut
kapiasudlartut
nâpkoarivattit.
Mel. 416.
Ill.
9.
Pilloringmêk illa Gûdiptingne
piulijauviksarsijoĸ,
okpertoĸ õmamut illũnânut,
Kristusemik tetteĸartoĸ.
Pijariaĸalerangat,
ikajortaudlarpoĸ tamât.
Halleluja! — Halleluja!
Nâlegak nertorpara attanertortiga; unnuarmetauĸ tâktuma kaiblarpânga. Nâlegak tautukôtsainarpara tallerpingnêmat aulaniangilanga
Mel. 151 g.
Ang.
10.
Oĸâlautigivara
illerasungnanga,
Arn.
ajungitoĸ Nâlegaĸ
atâtagigapko.
Ill.
Illagitsainarpânga,
nanẽtarangama,
aĸtornartut tamaita
oĸiglitillugit.
Mel. 195.
Kor.
11.
Hallelujârmilit
illũnatik Gûmik
atâtauneraijungnartut!
Hallelujârmilit
Gûmik naglingniktut
tâpsomungalo tunijut!
Ill.
Gûdivut — Zebaot
nertorlavut mâne
pânelo ĸilangme!
Mel. 9.
12.
Amen, Abba Jehova,
attit nertortaule!
Nakorivaptigille
issoĸangitomut.
----
C. Ernermik.
46.
Mel. 101.
Kor.
1.
Nellopĸotimut ĸaititse,
illagêt, Jêsusib inungit,
ittiganginut pititse,
tarnipsigut nakorivlugo!
Sunginapse illiniaritse,
tâpsomale tamainik pingmasse.
Ill.
2.
Iksivautavit sângane
pâmangavluta ĸenuvogut:
Jêsuse Gûdeojotit,
ijivut tautuktilaungmikit,
saimanermik tautulerĸovluta,
nertorlutit tagva perĸovluta.
Lit.
Nertortaule Jêsuse Kristuse ikpeksaĸ uvlomelo issoĸangitomullo tâmnatsamaĸ. Tâpsomûna illũnatik pingortitauvut ĸilangmẽtullo nunamẽtullo, takuksaujullo takuksaungitullo, iksivautaĸsuillo nâlegauvillo attaniotinerillo pitsartujoĸsuillo. Illũnamatsiatik pingortitauvut tâpsomûna tâpsomungalo. Tamaitaĸsuillo perĸârtinagit tâmna ilauĸpoĸ tamaitaĸsuillo tâpsomunga pairijauvut.
Mel. 7.
Ill.
3.
Jêsus pinarnartoĸ,
ivsornaitoĸsôjoĸ
nertorpât sorairatik
Engelit illũnatik.
Mel. 101.
Kor.
4.
Toĸotaĸ Gûb saugârsunga,
inoĸotivit nertorpâtit,
aungnut pissiarivluta
ĸennilauraptigut inungnit,
kiglinganit erĸaumagaptigut,
perĸovluta pilorigviksamut.
Lit.
Kristuse tikipoĸ ajoĸertuinerolerlune perĸutinik pijomârtunik. Aungminut nangminerminut atausiarlune ivsornaitovingmut iterpoĸ, issoĸarniangitomik piulijauviksamik piniarutjivlune. Tâpsomane piulijauviksaĸarpogut aunganut, tamadja ajornernit issumagijaujungnainermik.
Mel. 7.
Ill.
5.
Jésus issungitoĸ
puilaviovoĸ
epĸêjartauviksoaĸ
ajortunit tamainit.
Mel. 173.
6.
Gûmut nellopĸotijunga
tettituarivagit,
Jêsuse, pillorikpunga,
pivlunga auktogavit,
ĸejungmẽtillutit pêjaivigivarma
pidlautiksamnigle, toĸotigigamga;
piuliklernit illa okpernermut
tettigidlarpara nâksaungitomut.
Mel. 155.
7.
Nâlegaĸ, nertorpagit,
nukkeĸangitoĸ uvanga,
ajulertoĸ,
ullapirsalauramga;
taimaktauĸ
Gûdib inuĸotinginut
illaliortilauramga,
piulijigigapkit.
Mel. 101.
Kor.
8.
Kattimajoĸsuit pâne
anernerillo pilloriktut,
Gûb erninga opigomut
nakorisiuk Nâlegavut!
Illagivlutalo nâleksiuk!
Nertortaule attinga tamainut!
Lit.
Kristuse attaniovoĸ tunitjiviojoĸ pitsartunernik tamainik ĸilangmelo nunamelo Nâlegaĸ pairijigivavut ajoĸertortigivlugolo attanerivlugolo. Tâmna nertortaule issoĸangitomut!
Mel. 7.
Ill.
9.
Pinarnartut ĸilait
Jêsub mikkigivait,
inneĸaromavlune
õmatekulluptingne.
Mel. 183.
10.
Omatiga tagga ĸaipara!
Iniksautiuk illingnut,
anernikut kajungertitsuk
ĸuviasuktillugolo;
naglingnivit aĸĸartitivit
taipsomane uvaptingnut,
naglingnivit soraingitub
õmatiga innigiliuk!
Mel. 101.
Kor.
11.
Nâksaungitomut ômartoĸ
Gûd nertorpât Engelingita,
mâne oĸautigigivât
illa okpertoĸotingita.
Pânẽtose, nakoridlarsiuk,
illũnase pingortitaujose!
Lit.
Nertortaule Nâlegaĸ, nertortaule attinga ânanaudlartoĸ inuĸotingita iningine tamaine mãna issoĸangitomullo! Halleluja, Amen.
Mel. 7.
Ill.
12.
Attê, illũnata
imgervigilavut
Engelit pânẽtut
serritigijangat.
----
47.
Mel. Schoenster Herr Jesu.
Kor.
1.
Nâlegaĸ Jêsus,
Gûdeviksôjotit,
inungorsimajotit,
nagligivlutit
nertorlaptigit,
ânanaunerpaujotit.
Lit.
Tarnipta Nâlegaĸ nakoridlarpât anerniptalo Gûde piulijivut ĸuviasugvigivât, nutarârsuk erniangongmat uvaptingnut, enneĸ tunijaungmat uvaptingnut. Nâlegauninga tuingẽnepoĸ atteĸarporlo: tatamnadlartomik kajusijomik, Gûdemik pitsartujoĸsoarmik, atâtaujomik issoĸangitomut, Nâlekamik ullapirsaijomik. Davidib amârivlugolo kinguvârivâ uvloriangojoĸ ĸausiut ĸaumaridlartoĸ.
Mel. 228.
Ill.
2.
Kausiut ĸaumaridlartoĸ,
ullapirsaumik ĸaitsijoĸ.
ĸuvianarmêk illa!
Igvit, Davidib erninga,
tarnima anerijanga
inuĸotigivarma,
illũnainik saimanartunik pitaĸalloriktotit,
annernarnerpângojotit.
Mel. 83.
Ang.
3.
Jêsusigale illa
ĸemagomatsengilara.
Arn.
Nanele pitaĸarĸâ
serrinartomik ôtunaĸ?
Ill.
Pillorikpunga illa,
Jêsusib naglingmanga.
Mel. 11.
4.
Ullapĸutigijara,
ĸuviasuktitiga
Jêsusiga, tamainit
pituarẽnarpagit.
5.
Allianartut illa
aktarlukkogivakka,
toĸomut tunilauĸtoĸ
unganarnersaudlarpoĸ.
Mel. Schoenster Herr Jesu.
Kor.
6.
Pinarnartunit
takovaktaptingnit
pinarnarnerpaujotit,
igvit tamainit
annerivlutit
nagligẽnalaptigit.
Lit.
Nakoridlartaule Nâlegaĸ, inuĸotine nellipsarlugillo piulingmagit. Gûdipta õmatingata nâpkiningningagut nuijub ĸotsingnermit nellipsarpâtigut, itikavut torârtillugit apĸomut ullapirsartauvionartomut inuĸotingillo illitarsitillugit piulijiksamik, ajornernit issumangnarungnaitomik.
Mel. 228.
Ill.
7.
Manigornadlarpoĸ illa,
Jêsuse, nellunginama,
toĸungnut piuligamga!
Missigigapko tamanna,
tagva nunab pingit illa
nachogitsainarpakka.
Illa tagva pilloringnaĸ ĸuvianaĸ, Jêsusiga,
pigigamga pairivlunga.
Mel. 83.
Ang.
8.
Sunamut assianut
ĸillanângilaĸ tarniga.
Arn.
Jêsusele kissiat
ullapirsartiga Gûmut,
Ill.
assiotailitiga
tussugituinarpâ.
Mel. 11.
9.
Passigalloarmanga
idluitullinima,
pitsartuerutivâ
Satanas Jêsusima.
10.
Tarnikut sukôvlunga
ĸanimalerangama,
tamât piulijiga
inûlijigivara.
Mel. Schoenster Herr Jesu.
Kor.
11.
Nertortaudlarit,
nakorijaudlarit,
Jêsuse, uvaptingnut!
Uvlut tamaita
nâpkigivluta
takunâtsainartigut!
Lit.
Nertortaule Inûb Erninga ânanaudlartoĸ! Tâmna Gûdib tallerpiane iksivavoĸ nâlektauvlunelo Engelinut sôngojunullo pitsartudlartunullo. Tâmna Alfauvoĸ Omegauvlunelo, pigiarniovlunelo naggatauvoĸ sivorliovlunelo kingorliovoĸ ômavlunelo.
Mel. 228.
Ill.
12.
Tarnipkut serridlarpunga,
Jêsusemut okperama,
ajorungnairtimanga,
tâpsomalo nagliktima
angerautijomârmanga
ĸuvianartovingmut.
Kuvianaĸ! Omamut tamânut kajungidlarpunga,
paunga iteromavlunga.
----
48.
Mel. 80.
Kor.
1.
Nertordlerutiksara,
illisimautiksara,
piksatuarijara,
oĸâlautigijara
ĸaujijomavisiûk?
Ill.
Kikiaktorsimajoĸ.
Lit.
Jêsuse Kristuse kikiaktorsimajoĸ Gûdib illisimajutiksangortipâ idluarsijutiksangordlugolo ivsornaijutiksangordlugolo piulijaujutiksangordlugolo. Perĸutit illisimajutiksat illitarsijutiksallo tamaita tâpsomane ijersimavut.