Lit.

Kajungilârpunga avilunga tamângat Kristuse najoromavlugo, tamanna illa angijomik ajunginersaungmat. Toĸo ôngniangilara issoĸangitomut, pagrearniarlungalo toĸungajut makkiviksangannut, timima ĸemaktama asserortub attiniarmago asserojuitoĸ. Uvinik nerriuklune merngoerserpoĸ; igvittauĸ, toĸojuksaujotit, Gûdib ômartitsomârpâtit, tâpsoma anerningata inigilaungmatit.

Ill.

Amen.

Lit.

Okperpunga, ĸatangutivut illavullo, Nâlekame sinisimalerunik, illagêktunut takpânẽtunut aisimangmatta ittersimavlutiglo Nâlekamik ĸuvianarninganut; timingit nuname illuversimajut.

Lit.

Mãna sinisimajut illagêne ovanẽtune jâreme ĸângertome makkivianit erĸaumavavut, attingit taivlugit N. N.

Ill.

Ajortokullôjogut tuksiarvigivaptigit: tussalaungmitigut, nagliktotit Nâlegaĸ Gûdelo!

Lit.

Uvagullo illagêktunut pijarêrsimajunut illũnainut illagêngnermêtsainartitigut issoĸangitomut, sukutsianelo piniarniptingnit merngoersiĸatigêktitigut ikkingne!

Ill.

Amen.

Lit.

Nertornarpoĸ makkitjutauvlunelo inôgutaujoĸ. Tâpsomunga okpertoĸ, toĸogalloarune, inôjonmârpoĸ. Tamna nertortautsainarle soraingitomik illagêktune utanĸĸijingine najorninganẽtunelo,

Ill.

issoĸangitomit issoĸangitomut.   Amen.

Lit.

Illiptik N. N. aperivaptik Jêsusib sângane: Una ĸitorngatik, Jêsusib aungminut pissiarilauĸtanga, tâpsoma pingatut pairijomavitikkô? saputillugolo idluitunit Gûdiblo oĸausinginik ĸaujitiniarlugo idluarijanganullo inugoijomavitikkô?

Ang.

Ahaila.

Lit.

Kristuse, Gûdib saugârsunga, sillaĸsoarmiut ajorninginik nangmartotit,

Ill.

ullapirsautingnik tunitjivigilaungmitigut!

Lit.

Sakramenteĸotîngnut ivsornaitoĸsôjûngnut

Ill.

pitsartutilaungmitigut, nagliktotit Nâlegaĸ Gûdelo!

Lit.

Baptijut kinamit pigivitigô?

Sor.

Nâlegaptingnit Jêsuse Kristusemit oĸalauĸtomit: Aileritse inôĸatigêksuillo tamaita ajoĸertorsigik baptillugillo Atâtab Ernerublo Anernerublo ajunginerub attinganut; ajoĸertorsigiglo mallerĸovlugit tamainik perĸojamnik illipsingnut.

Lit.

Baptijut sunauvâ?

Sor.

Angerĸatigêngniovoĸ issumame passijaksaungitome Gûdemelo erniangupsârnerublo ubvautâ Anernerublo ajunginerub nutângortitsininga, Gûdib kovilauĸtangata uvaptingnut amigangitomit Jêsuse Kristusekut piulijiptigut.

Lit.

Suna Nâlekab angerutigivaûk baptijut pivlugo?

Sor.

Okpertoĸ baptitaujorlo piulijaujomârpoĸ.

Lit.

Sorutsittauĸ saimanartoĸ tamanna illangiutivigijunarpatsûk?

Sor.

Ahaila.

Lit.

Nerriungneĸ tamanna sunamut tungatitaumavâ?

Sor.

Kristusib oĸausinginut imaitunut: Nutaĸĸat uvamnut pilit inerterasigiglo, tâpkoa Gûdib nâlegauvinga pigingmatsuk.

(Baptitaksaĸ ĸaitautillugo mãna sâmut tuksiarutijauvoĸ imâk:)

Lit.

Jêsuse Kristusemut baptisimajose, ĸanoĸ baptitauvisê?

Ill.

Jêsusib toĸunganut.

Lit.

N. N. igvittauĸ mâna Jêsusib toĸunganut baptipagit Atâtab Ernerublo Anernerublo ajunginerub attinganut.

(Baptitaujoĸ pattingmijautillugo.)

Mãna Jesuse aiparivlugo baptijutekut illijartortauvotit toĸunganut.

Ill.

Jêsusib attingane.   Amen.

Lit.

Inôniarit mãna, igviungitorle, Kristusele inôle illungne. Mãnale uviningme inônernik tamattominga inôniarit okpernerme Gûdib erninganut nagliktingnut ingminiglo tunijomut pivlutit.

Lit.

Nâlekab pitsartutilitit saputilitillo!

Nâlekab kênarminut ĸaumaksarlitit saimartilitillo!

Nâlekab kênarminut ĸollangiarlitit ullapirsautiminiglo tunitjivigilitit!

Ill.

Jêsub attingane.   Amen.

(Oĸâlajoĸarĸârtillugo tuksiartoĸarĸârtillugolo ajoĸertuijoĸ baptitaksab sânganut nangeriartorpoĸ oĸarlunelo:)

Lit.

Najornernut nekoĸsinartomut sakramenteĸotîngnullo ivsornaitoĸsôjûngnut

Ill.

pitsartutitigut, nagliktotit Nâlegak Gûdelo!

Lit.

Okperĸêt Gûdetôjomut, Atâtamut Ernermullo Anernermullo ajunginermut, ĸilaublo nunablo pingortitingangnût?

Bapt.

Ahaila, okperpunga.

Lit.

Kigligiutjivêt, Gûdib ivsornaitoĸsôjub sângane nangerlutit sappidlaravit, ajortoliksôvlutille pidlaraksatuinaugavit tâpsomunga?

Bapt.

Ahaila, taimailinganimnik kigligiutjivunga.

Lit.

Okperĸêt, Gûdib, Nâlegapta Jêsusib Kristusib Atâtangata anerilaungmattit, sillaĸsoaĸ tunganilijaurĸârtinago, piulilaungmattit tâĸtub pitsartuninganit nuktertillutillo Ernerme erdligijame nâlegauvinganût?

Bapt.

Ahaila, okperivara.

Lit.

Okperĸêt, Jêsuse Kristuse, Gûdib Ernituanga Nâlegaungmat ilingnut, assiojuksaujotit pidlaraksaularpillo inôjotit, piulingmattit ajortunit tamainit toĸomillo Sâtanasiblo pitsartuninganit, goldemut silberemullõnêt pinane, aungminulle hailigemut akkitudlartomullo âniaminullo passijaksaungitomut toĸominullo?

Bapt.

Ahaila, okperivara.

Lit.

Okperĸêt, Anernerub ajunginerub ĸairĸungmattit oĸautsinut tussarnertunut, tunergutiminullo ĸaumaksarmattit, okpernerme mikseĸârtome ivsornaitillutillo soĸosijuitillutillo pingmattit?

Bapt.

Ahaila, okperivara.

Lit.

Killanâdlarĸêt, baptijutikut ubvautaujokut ajornernit tamainit ubvartaujomavlutit Jêsusib Kristusiblo illagêktoĸotinginut illaliortaujomavlutit?

Bapt.

Ahaila, ĸillanârivara õmamut tamânut.

Lit.

Angidlarĸêt, kivgartorneĸ ajornermik ipperaromavlugo mânanillo, illagêngoĸatauleravit Jêsusib illagêktoĸotinginut, inõjomavlutit tâpsomunga toĸolauĸtomut makkilauĸtomullo pivlutit?

Bapt.

Ahaila, angerutigivara, Nâlegara Jêsuse Kristuse pitsartutitsijoĸ sungertutigivlugo.

Lit.

Jêsuse Kristusemut baptisimajose, ĸanoĸ baptitauvisê?

Ill.

Jêsusib toĸunganut.

Lit.

N. N. igvittauĸ mãna Jêsusib toĸunganut baptipagit Atâtab Ernerublo Anernerublo ajunginerub attinganut.

(Baptitaksaĸ pattingmijautillugo.)

Kemergulerit, ĸanoĸ angijomik naglingnermik Atâta saĸĸijârtitsingmat illingnut, Gûdib ĸitornganganik taijaurĸogamitit. Ivsornaitut tagva kinguvângoĸatigivâtit Gûdiblo iglungane iglomiôĸatauvotit. Taimaimat inôniairit, igviungitorle, Kristusele inôle illungne. Mãnale uviningme inônernik tamattominga inôniarit okpernerme Gûdib Erninganut nagliktingnut ingminiglo tunijomut pivlutit.

Lit.

Kristusekut tamapta apĸutiksaĸarpogut Atâtamut anernerme attautseme. Taimaimat tuksiaĸatigêlauĸta imâk:

Ill.

Nâlegaĸ Gûde, Atâtavut ĸilangme, attît nertortaule; nâlegaunît ĸailaule; pijomajat piniartaule nuname sôrlo ĸilangme; uvlome piksaptingnik tunitjivigitigut; idluinivut issumagijungnaikkit, sôrlo uvagut idluitullivigijivut issumagijungnairvigigaptigik; ôktortaulungnermut pitinata; piulitigulle ajortomit. Nâlegauneĸ pitsartunerlo ânanaunerlo pigigangne issoĸangitomut.   Amen.

Lit.

Nâlekab pitsartutilitit saputilitillo! Nâlekab kênarminut ĸaumaksarlitit saimartilitillo! Nâlekab kênarminut ĸollangiarlitit ullapirsautiminiglo tunitjivigilitit!

Ill.

Jêsub attingane.   Amen.

Lit.

Najornernut nekoĸsinartomut

Ill.

pitsartutitigut, nagliktotit Nâlegaĸ Gûdelo!

Lit.

Nagliktâkka, Gûdib kênangata sângane kaiblarpaptik, nellâgut kigligiutjerĸovlutik mãna, illiptingne sunamik kattititautailiutaurĸojaujomik aiparêngnermut ĸaujimangâptik.

(Ajoĸertuijoĸ oĸarĸârtoĸ itjuarlugo uiksaĸ oĸarpoĸ tagva:)

Uiksaĸ.  

Nellâgut kigligiutjivunga, kattititautailiutaurĸojaujomik uvamnullo ômungalo senimnẽtomut N. N. ĸaujinginama.

(Taimaktauĸ nulliaksaĸ ajoĸertuijoĸ itjuarlugo oĸarpoĸ:)

Nulliaksaĸ.  

Nellâgut kigligiutjivunga, kattititautailiutaurĸojaujomik uvamnullo ômungalo senimnẽtonmt N. N. ĸaujinginama.

Lit.

Tagva, nagliktara N. N. aperivagit: Arnaĸ una tigujomaviuk aiparijomavlugo, sôrlo Gûdib oĸausingita perĸungmattit? nagligivlugo pattangaitillugolo opigivlugolo pairivlugolo ĸanimatillugo ĸanoengitsiartillugolo? ungagijatuarivlugolo toĸomut avititaurĸâratîk?

Uiksak.  

Ahaila.

Lit.

Tagva igvittauĸ, nagliktara N. N. aperivagit: Angut una tigujomaviûk aiparijomavlugo, sôrlo Gûdib oĸausingita perĸungmattit? nâleklugo kivgartorlugolo nagligivlugolo opigivlugolo manigorlugolo ĸanimatillugo ĸanoengitsiartillugolo? ungagijatuarivlugolo, toĸomut avititaurĸâratîk?

Nulliaksaĸ.  

Ahaila.

(Ketterdlemik pitillugo arnab mikileranganut saumianut agganelo tagvanẽtillusit angut oĸarpoĸ ajoĸertuijoĸ itjuarmivlugo:)

Uiksaĸ.  

Ketterdlermik una tunivara illingnut, nellunaikutaksautillugo aiparêngnîptingnut ukkoalo najûtijut kigligiutjijeorĸovakka, uvanga N. N. igvit N. N. tigugapkit aiparijomavlutit.

(Arnarle ajoĸertuijoĸ itjuarlugo oĸarpoĸ:)

Nulliaksaĸ.  

Ketterdlermik una tiguvara, nellunaikutaksautillugo aiparêngnîptingnut ukkoalo najûtijut kigligiutjijeorĸovakka, uvanga N. N. igvit N. N. tigugapkit aiparijomavlutit.

(Aiparêlertuk tallerpingit tigutitillugit ajoĸertuijoĸ oĸarpoĸ:)

Lit.

Katangutivut N. N. ĸatangutivullo N. N. angiĸatigêngmanik aiparêngnermut tamannalo sagvartingmakko Gûdib sângane illagêllo takkoanne tigûtinermut tunitjinermullo tigusinermullo ĸetterdlermingmik, tagva aiparêktôrĸovakka mãna Atâtab Ernerublo Arnernerublo ajunginerub attingane. Gûdib kattititâgigle inûb avititaksaringilak.   Amen.

(Kattititautainartûk sêrĸortulerpuk.)

Lit.

Nâlegaĸ, Nâlegaĸ Gûde, nangmineĸ nulliarêngnermik illijilauĸtotit saimaivlutillo, tuksiarvigivaptigit ukkoa kattititautainartûk pivlugik: Nulliarêngningak ivsornaitilauruk saimanartillugolo! Ajoĸertulaukik, nagliktigêlerĸovlugik naglingnermut Kristusib naglingnerijanganut uvaptingnik. Omatîgik iglungaglo inigijartulaukit, uvlut tamaita ajoĸsatailitikik piksanginik aggangitalo piniarningit sullitilaukit. Serngnigijauviksautsainalaurittôĸ attuinaujoĸ tâpkungnunga. Ikajulaukik, siorniornartokullo kiksarnartokullo arvertartuksaugalloarlutik sungertûteĸarungnailerĸonagik naglingnernik. Kairĸojaumanîgik anerijaumanîgiglo aulajuitikit tâpkungnunga saimanernut. Nulliarêngnermingne kivgartortilaukik ilingnut tessiortigêtsiartillugiglo apĸome inôtsemut nâksaungitomut. Taimak illagêt akkornganne arvertartilaukik pivalliatillugiglo, issumatillo tamaita idluarĸutiksanginut nellautsitikit piloringnartomik, ĸairĸojijutitit aiparêrĸojijutitillo tâpkungninga nãmakserĸârtinagit.   Amen.

(Kattititaujûk pattingmijautillugik)

Lit.

Nâlekab pitsartutilitit saputilitillo!

Nâlekab kênarminut ĸaumaksarlitit saimartilitillo!

Nâlekab kênarminut ĸollangiarlitit ullapirsautiminiglo tunitjivigilitit!

Ill.

Jêsub attingane.   Amen.

Lit.

Tagva mãna aperivapse, Nagliktakka: angilaurapse, kivgartoĸataujomavluse illagêt akkornganne, tussugalloarĸisê, nangmineĸ ubvartaurĸâromavluse ajornipsingnit nãmanginipsingnillo tamainit ĸaut tamât Jêsusib aunganut, taimaglo naglingnermut Jêsusemik kivgartoromavluse illagêt akkornganne merngortorlugase, ĸatangutigijapse idluarĸutiksangannik pinasuarluse oĸausipsingnullo piniarnipsingnullo? Nâlekamut perĸojaunipsingnik piniaromavisê, nangminipsingnik tettiginase, Jêsusemulle kissiane aulataujomavluse tâmnalo ikajortituarijomavlugo? Taimak mãna Gûdib illagêllo sânganne angeromavisê?

Kivg.

Ahaila.

Lit.

Angerivisê, ajoĸertuijersuit ajoĸertuijullo, Nâlekab illilauĸtangit illagêt pairijauniksangannut, ikajoromavlugit pijungnarnipsingnut, nâlegomavlugillo sõrlo Grûdib oĸausingit perĸojingmatta, illusiorĸojaujullo illagêt akkornganne nangmineĸ malligomavlugit malliktautinasuarlugillo inôĸatipsingnût?

Kivg.

Ahaila.

Lit.

Nâlekab saimarsainerminut pitsartutilise, angernise malliklugit piniarungnarĸovluse! Angernisele tamanna illagêt sânganne aulajuititsomavlugo mãna tigulertorniarpapsinga, sôrlo pernojaugapta.

Lit.

Nertornarpoĸ makkitjutauvlunelo inôgutaujoĸ! Toĸungalauĸpoĸ, ahâglo inôvoĸ issoĸangitomit issoĸangitomut. Tâpsomunga okpertoĸ, toĸogalloarune, inôjomârpoĸ. Tâmna nertortautsainarle soraingitomik illagêktune utaĸĸijingine najorninganẽtunelo.

Ill.

Issoĸangitomit issoĸangitomut.   Amen.

Lit.

Nâlegavut Jêsuse Kristuse.

Ill.

nâpkigitigut!

Lit.

Erniarigonivit inuktut,

arvertarnivit nuname

inôtsivit siorniorningita tamaita,

sangẽnivit âniadlarnivillo

tarnivit siadlerningat kapiasungningallo tamât,

aulaumajârtitaunivit toĸomut,

aungmik kitjijârnivit,

ĸellaksortaunivit, anaulertaunivit mitautigijaunivillo,

issaĸajaunivit niaĸôsertaunivillo kakkilautilingnik.

kikiaktortaunivit nachonartub seningajolingmut,

ikkivit hailigit,

aukpit akkitojub,

toĸovit ivlernartub,

tikitsomârnivit uvaptingnut angerarĸojauniptalõnêt ilingnut

Ill.

manigorlitigut, nagliktotit Nâlegaĸ Gûdelo!

Lit.

Inôtsivit âniavillo toĸovillo akkiliutiksarsêninginut tamainut

Ill.

pitsartutitigut, nagliktotit Nâlegaĸ Gûdelo!

Lit.

Merngoersernernut, illuverme,

sâlaĸarlutit makkinernut,

ĸilaliarnernut ânanaudlartomut,

iksivalernernut Gûdib tallerpiata tungâne,

najorneruut nekoĸsinartomut

Ill.

pitsartutitigut, nagliktotit Nâlegaĸ Gûdelo!

Ajortokullôjogut tuksiarvigivaptigit: tussalaungmitigut, nagliktotit Nâlegaĸ Gûdelo!

Lit.

Idluarigangnelo, ĸatangutivut (illavut, soruseĸ) N. N. ĸairĸovlugo issoĸangitomut, tagva tuksiarvigivaptigit: uvaptingniktauĸ ajoĸertuilaurit issumaksarsiornermik toĸojuĸsauniptingnik; anerimanivut aulajuititsuk saimanernut; illagêktunut pijarêrsimajunut tamainut illagêngnermêtsainartitigut issoĸangitomut; sukutsianelo uvaguttauĸ piniarniptingnit merngoersiĸatigêktitigut ikkingne!

Ill.

Tussalaungmitigut, nagliktotit Nâlegaĸ Gûdelo!

Lit.

Nâlekab pitsartutilitit saputilitillo!

Nâlekab kênarminut ĸaumaksarlitit saimartilitillo!

Nâlekab kênarminut ĸollangiarlitit ullapirsautiminiglo tunitjivigilitit!

Ill.

Jêsub attingane.   Amen.

Lit.

Nakorijaule Nâlegaĸ pitsiarnine tattamnartoĸ saĸĸertilaungmago uvamnut,

Ill.

Nâlegak nakorijomavara nelliutunne tamaine, nertortauninga ĸannimnêtsainartuksauvoĸ sorairane.

Lit.

Illagilunga Nâlegak nakorissiuk,

Ill.

Illagêklutalo attinga angijorortilavut!

Lit.

Tuksiarta:
Gûde Atâtavut Kilangme, perĸovaptigut opigosurĸovluta illingnik naglingnerme; ikajulauktigut erĸaumarĸovluta iglungnêgapta. Tunitjivigilauktigut ikajortaunermik Anernernut, tuksiarungnarĸovluta Illingnut, nertordlerungnarĸovluta illingnik ômatiptingnut illûnânut, illiniarungnarĸovlutalo illiniartuksauniptingnik Oĸausernit pivianartunit; taimak tuksiarpogut Jêsuse Kristusekut Nâlegaptigut.

Ill.

Amen

Lit.

Gûde oĸalauĸpoĸ oĸautsinik ukkuninga oĸarlunelo: Uvanga Nâlegauvunga Gûdît, sennipkut assimnik Gûdeĸartuksaungilatit.

Inungoarmik adsingoarmiglônêt senajuksaungilatit pivlutit.

Nâlekab Gûdivit attinganik attornerluktuksaungilatit. Uvloĸ sabbateojoĸ erĸaruk, ivlerijaurĸovlugo ilingnut.

Atâtangnik anânangniglo nâlektuksauvotit. Inuartuksaungilatit.

Nulliarêngnermik asseroijuksaungilatit

Tiglihtuksaungilatit

Inôĸatitit saeglutigivlugit oĸartuksaungilatit.

Inôĸativit perĸutingit pijomajuksaungilatit

Ill.

Nâlegak nâpkigitigut, ikajorlutalo ômatiptigut nâlerĸovluta perĸojarnik.

(illaget ingiput)

# (Gudib oĸausingit atuartauvut tuksiarutsiĸarporlo) #

(illagêt nikkoviput)

Lit.

Jêsuse nunamut pivoĸ oĸâlavlune oĸautsinik tussarnertunik Gûdib nalegauvinganik, illiniartingillo ajoĸertolaukpait, oĸarlune:

Piloridlarput aklujut anernerme:

Ill.

Nâlegauvik Kilangmêtoĸ pigileramitsuk

Lit.

Piloridlarput kiksartut;

Ill.

Manigortaujomârmatta

Lit.

Piloridlarput Kenuêtut;

Ill.

Nuna pigileramitsuk

Lit.

Piloridlarput kâktut imeruktullo idluarnermik;

Ill.

Illumertaujomârmatta

Lit.

Piloridlarput nâpkiniktut;

Ill.

Nâpkigijaujomârmatta.

Lit.

Piloridlarput ivjornaitanik ômatilit

Ill.

Gûde takkojomâramitsuk

Lit.

Piloridlarput ullapirsaijut;

Ill.

Gûdib Kitornganginik taijaujomârmatta

Lit.

Piloridlarput unangmijaudlartut idluarneĸ pitjutigilugo;

Ill.

Nâlegauvik Kilangmêtoĸ pigileramitsuk.

Lit.

Tuksiarta:

Ill.

Nâlegak Gûde Atâtavut Kilangme; attît nertortaule; nâlegaunît Kailaule; pijomajat piniartaule nuname sôrlo Kilangme, uvlome piksaptingnik tunitjivigitigut; idluinivut issumagijungnaikit, sôrlo uvagut idluitullivigijivut issumagijungnairvigivaptigik; ôktortaulungnermut pitinata; piulitigullo ajortomit! Nâlegauneĸ pitsartunerlo ânanaunerlo pigigangne issoĸangitomut   Amen.

Lit.

Gûde Ivsornaitotit Nâpkigosuktotillo, ajoĸertorlauraptigut Kaĸĸialerupta ômamut tamânut issumagijungnairvigigaptigut Kuviasudlarlutit. Kaĸĸialerpogut mâna kiksartitauvluta piniarlungnivut pivlugit idluarnermiglo piniarlaunginivut pivlugit; ivsornaititigut nangminênarasuarniptingnit issumalungniptingnillo kiksartitsijunik assipta inôsinginik agviartitsijuniglo Nâlegauvivit tikkitsungnarninganik.

Ill.

Piniarnikka kamaginiarpakka, ajornikkalo kiksarutiginiarpakka

Lit.

Gûde, Atâtavut Kilangme, pitsiartotsainartotit uvaptingnut; tunitjivigivaptigut inôtsemik atsuilernermiglo illûnainiglo piojunik Kuviasutigijaptingnik. Erĸaumatitiguttôĸ silaksoaĸ tâmna perĸutigigange, erĸaumavluta nunamêgavittauĸ sôrlo Kilangmêgavit. Senniptingnêgavit pairivluta erĸsijuilaukta kissianele kiksartikuptigit assivullo aĸsârlugit inôtsib Kuvianarninginik.

Ill.

Ajorĸertorlaunga apĸutingnik, Nâlegak: arvertarungnarĸovlunga mikseĸârnerne

Lit.

Nâlegaĸ, Aulatsijotit sillaksoarmik, Anernit kovilauruktôĸ inungnut illûnainut, inôĸattigêksuit inôĸattigêgungnarĸovlugit ullapirsaume nâlegauvivit perĸojangit malliklugit. Kennuvigivaptigit nunaĸotivut saimalauruk, attanivut inuĸotingillo saimalaukit, tamaita aulatsijut kivgartortullo. Nâlegauvingmioĸattivullo pitsartutikit maksuatikillo arvertarĸovlugit nâlengnarnerme, naglitilauktigut ullipirsautib ivsornainerublo apĸutinginik

Ill.

Apĸosinît illitarititaulit nuname, nellojullo akkorngane piuliklernît.

Lit.

Gûde, Piuliklerteojotit illûnainik tetteĸartunik illingnut; tuksiarpogut Kristusib illagêktoĸotingit sillaksoarme illûnâne pivlugit. Ilumalaukit Anernernut angijororungnarĸovlugit okpernerme naglingnermelo saĸĸêrĸovluta iduarnerub paunganginik nâlegauvivit nertortauninganut inuit akkorngane.

Ill.

Ajokertortigut kivgartorĸovluta, Nâlegaĸ, illingnik idluarnitit malliklugit, tunitjivluta issumaksarsiorlugata kivgartornipta akkinga pivlugo, sorsutsiarĸovlutalo erĸsilugata, sullitsiarĸovlutalo merngoêrnersiorlugata akkiliksarsiorlugata kissianele Kaujimatitauvluta piniarapta pijomajarnik.   Amen

Lit.

Nâlegaĸ Gûde, Kairĸojileraiguvit kivgarnik ôktorĸovlugit angijoĸsoarnik, Kaujimatitiguttôĸ nertortaunersigapta pigiarnermu-ungitoĸ, pijarêrsimanermulle, Tâpsomuna pijarêrsimajokut piniartauĸojangnik tunitjivlune inôserminik, Piuliklertivut Jesuse Kristuse.   Amen.

(Oĸâlaneĸ)

Lit.

Tuksiarta
Kujagivaptigit, Nâlegak, inôtsib saimartitsininginut tamainut; atsuilinermut, nukkeĸarnermullo, Ahaila Kujagivaptigit Kuviasungnermut illanâĸarnikkut, kivgartornermullo. Kujagivaptigit sillaksub ânanauninganut, angajoĸâllo naglingninganut, naglingernullo nellonaijartaujunut uvaptingnut sorusiôtiluta. Ikajulauktiguttôĸ akkiniarĸovluta akkiliksapta illanginik ikajorluta inuĸatiptingnik pijariaĸartnigine; Jêsuse Kristuse pivlugo.   Amen

Gûde, perĸojilauktotit nâlerĸovluta angajoĸâptingnik, ernikkullo, Piulijivut, saimartitsilauktotit angerarvit inôsingannik, Kennuvigivaptigit nagligijavut illavullo illunaita sapputilaukit; illa sapputilaukit nangianartunit timekut tarnekullo, ikajorlauktigullo piniarĸovluta piniaraksaptingnik taipkununga; attausiotitigullo nagliktigêngnerme opigosungnermelo illing- *   Amen

Nagliktotit nâpkigosuktotillo Atâta, saimanikkut Kittorngaulertitauvogut illingnut, tunitjivigivlutalo sulliaksaptingnik kivgartoromarĸovluta illingnik inuĸatiptingniglo; tunitjivigitigut ômatinik nagligosuktunik inoĸattigêgungnarĸovluta ullapirsaume nellâgortome, nagliktigêngnermelo attausionermelo Kuviagijangnut, Jêsuse Kristuse Nâeegavut pivlugo.   Amen

Atâtaujotit illunainut, atsuiliniptingne Kuviasungniptingnelo inuit illûnaita siorniortut kiksartullo erĸaumavavut. Tuksiarvigivaptigit sorutsit Kanimajut pivlugit, sorutsillo peĸangitut angajoĸât naglingninganik, inuillo illunaita oĸumaineĸartut pivlugit. Pitsiartoĸsônerne mannigukkit ikajorlugillo Kaujimatsiarnernut Jêsuse Kristuse Nâlegavut pivlugo   Amen

Lit.

(uvlârmut) Ikajulauktigut, Gûde, uvlome piniatsiarĸovluta piniaraksaptingnik Kuviasungnerme katsungainGermelo ômatiptigut. Ikajulauktigut piniarĸovluta idluarnermik erĸsilugata sunamiglônêt. Soĸĸosijuititiguttôĸ nangminênarasuarlugatalo pitsartutitigut; tikkititaulaukta uvlub nâninganut kangusulugata ullapirsauteĸarlutale issumaptigut; Jêsuse Kristusekut, Nâlegaptigut.   Amen

(unnungmut) Tunitjivigilauktigut, Kristuse, ullapirsautingnik unnuarme tamattomane, sapputilutalo uvlâb nuininga. tikidlugo Taipsomanelo tunitjiviolaukta nukkemik timiptingnut, pitsartunermiglo anernikkut, nâletsiarungnarĸovluta nellâgut illingnik. attît pivlugo   Amen.

Lit.

Piulijivut oĸarpoĸ, Kaititse uvamnut tamapse ajúlertose kappiasuktoselo naĸoĸsititsom avapse. Nangmautara illipsingnut pisiuk illiniarvigivlungalo; Kenuenama piojorijuilarmelo ômatimne; tagva merngoerserviksarsiniarpose tarnipsingnut Nangmautara idluarmat nangmagaralo oĸipoĸ. Uvanga Kaĸĸojauvunga inogutilik. Uvamnut Kaijoĸ kângniarungnairpoĸ; uvamnullo okpertoĸ imerosungniarungnairpoĸ

Nellopĸotimarigalloarapta Kaivogut sângnut ômunga tetteĸarluta idluarniptingnik-ungitoĸ nâpkigosungnernulle angijoksoarmik. Igville Nâlegauvotit taimaitomik, nâpkigitsainartomik. Ikajulauĸ-tigut, Nâlegak saimarsaijoĸ, nerrirĸovluta Kaĸĸojamik ominga imerĸovlutalo ermgusearsungmit ômangat ivsornaitaurĸovluta illagêngniptigut illingnut ajorniptingnit, inôtsainarĸovlutalo illingne igvillo uvapingnêtsainarĸovlutit.

Amen.

Tuĸsiarneĸ

Nâlegaĸ Jêsuse Kristuse, nertorpaptigit Kujagivlutillo inungorlauravit toĸĸovlutillo Kejungme Senningajolingme piulijauniptingnut; Taipsomanelo tunilauravit tunnergutiksatut Oĸautsine Hailigine illijilauravit Kommunionemik erĸaumatsainarĸovluta toĸĸungnik pivianartomik Tamanna pivlugo erĸaumavisiorpogut nerrimâraksangnik kingorlermik illiniartivit akkorngane, Erĸaumavlutalo piniarnernik siorniornerniglo toĸĸungniglo, makkinerniglo toĸĸungajunit Kilaliarnerniglo, uvagut kivgatit erĸaumaviksiorpogut toĸĸungnik pijomajat malliklugo; Kujagivaptigillo nellopĸotilunginasugigaptigut nangerĸovluta sângnut.

Nikkanarsârluta Kennuvigivaptigit saimartitaurĸovluta Anernernut Ajungnermut Omartitsijomut illijitiluta tunnergutinik ukkuninga Kaĸĸojamik wainemiglo una ikajorungnarĸovlugo taimatauĸ Taimak uvagut illagêktoĸotingillo illûnaita illaliorluta timingnik aungniglo okpernikkut taĸuaksarsijungnarapta tarnipta angijorortitauningannut saimanerme.

Tamanelo tunitjivogut illingnut, Nâlegak, nangminiptingnik, timiptingnik tarniptingniglo tunergutiksatut ivjornaitotut ômajotut Kennuvigivlutit uvagut illûnata Kommunionesiortogut illumajaurĸovluta saimanernut Kilaublo ullapirsautinganut.

Nellopĸotigalloaraptalo, idluitulliĸartarniptigut, tunitjigapta tunnergutiksanik, sullele Kennuvigivaptigit illaliorlauktiguttôĸ kivgartorniptingniglo ôktorlugatit nellopĸotmaringimangâpta, issumagijungnairvigivlutale ajorniptingnit. Illagêngneĸarlutalo Soĸĸosijuitunut nunamêtunut Kilangmêtullo tuksiarvigivaptigit uvagut inuillo illûnaita piulilauktiguttôĸ, Illingnullo Atâtanullo Anernernullo Ajunginernut nertortauleĸarle nakorijauneĸarlelo issoĸangitomut   Amen.

Nâlegapta Jêsunuarme taipsomane, pititaugame, Kaĸĸojaĸ tiguvâ Kujalivlunelo avgorpâ, illiniartiminullo tunivâ oĸarllunelo, “Tigulugo nerrisiuk tagva timiga tunijauniartoĸ pivluse; taimailioritse erĸaumajauniksamnut

***

Nerrisiuk, tagva Nâlegapta Jêsusib Kristusib timinga toĸĸomut tunijaumajoĸ pivluta

***

Taimaktauĸ ermgusiarsuk tigugivâ nerrijarêramik Kujalivlunelo tapkonunga tamna tunivâ, oĸarlunelo “Illûnase tagvangat imeritse, tagva auga, testamentitâb aunga, kovijauniartoĸ illipse pivluse, unuktullo pivlugit ajornerit issumagijaujungnairutiksanginut. Taimailioritse imerlerangapsiuk erĸaumajauniksamnut.

***

Imerisiuk tagva Nâlegapta Jêsusib Kristusib aunga kovijaumajoĸ pivluta, Kujalivluselo

***

Nâlekab pitsartutilitit saputilitillo

Nâlekab kênarminut Kaumaksarlittit saimartilitillo

Nâlekab kênarminut Kollangiarlittit

ullapirsautiminiglo tunitsivigilittit.

Jêsusib attingane   Amen.

Lit.

Kilait ilipse, opigosugitse! nunaĸsoaĸ igvit, ĸuviasugit, Nâlekab ânanaunersoanga saĸĸertitaujomârmat uvinigillo illũnamatsiatik takojomârpât; Nâlekab ĸanninga oĸarmat. Igvit, Zionib pannia, ĸuviasudlarit! Ahâk, attanit ĸaivoĸ illingnut; idluartôvlune piuliklerteovoĸ.