This yere Sr. John Bailloil kyng of Scotlond yaf up the reaume of Scotlond and the crowne to kyng Edward at Rokesburgh. Also in this yere the town of Berewyk was yolden up to kyng Edward. And in this same yere, that is to seye the yere of oure lord a ml ccclvjto, the xix day of Septembre, kyng John of Fraunce was taken at the bataill of Peyters be the doughty prynce Edward the firste sone of kyng Edward. Also Sire Philip his sone was taken with hym; and the erle of Pountys, the erle of Ewe, the erle of Longeville, the erle of Tankervyle, with othere viij erles and thre bysshoppes: and there were sclayn the duke of Burbon, the duke of Daceus constable of France, and the bysshop of Chalons, and manye othere grete lordys of Fraunce; and the dolphyn fledde.

In this yere prynce Edward, with kyng John of Fraunce and with alle hise presoners, comen into Engelond the xxiiij day of May, aboughte iij of the belle at afternoon he rod over London brigge toward the kynges paleys at Westm’. Also the same yere were ryall justes in Smythfeld, there beynge present thre kynges, that is to say the kyng of Engelond, the kyng of Fraunce, the kyng of Scotlond; and manye othere grete lordys of diverses regyons.

This same yere the kyng helde ryally seynt George feste at Wyndesore, there beynge kyng John of Fraunce; the whiche kyng John seyde in scorn, that he sawe never so ryall a feste and so costelewe mad with tailles of tre, withoughte payeng of gold and sylvere.

REX EDWARDUS TERTIUS. [1360-1362.]

This yere, in the xiiij kal’ of Juyn, Sire John erle of Richmond, the kynges sone, wedded dame Blaunche.[63] Also in this yere kyng Edward seyled to Caleys, and rood up into Fraunce, because Charles regent of Fraunce thanne meved werre.

This same yere, that is for to seye the yere of oure lord a mlccclx, the xiiij day of Aprill thanne beynge the morwe after Estre day, kyng Edward with hys oost lay aboughte Parys; Blak Monday.whiche day was a foul derk day of myst and of hayl, and so bitter cold that manye men deyde for cold: wherfore unto this day manye men callen it the blake Moneday. This same yere were rovers on the see, undyr the governayle of the erle of Seynt Poule; whiche the xv day of March distroied the townes of Rye and Hastinge and othere be the see syde, and sclewen manye men. Also in this yere the pees was made betwen the kyng Edward and kyng John of Fraunce, the xv day of May: and kyng Edward sente hise ambassatours into Fraunce, and toke the othe of Charles regent of Fraunce, whiche othe was plight undir this forme: Charles dede lete solempnely a masse to be songen; and whanne Agnus Dei was thries seyd, Charles leyde his right hand upon the patene, whereupon lay Godes body, and his lefte hond pressyng don upon the masse bok, seyenge, We swern upon the holy precious Goddes body, and upon the Evaungelies, fermely to holden anentes us pees and concord fourmed betwen the too kynges of Fraunce and of Engelond, and in no manere to do the contrerie. Also in this yere mennes, bestes, trees, and housynge were alle to smyte with violent lyghtnynge, and sodeynly peresshyd; and the devell in mannes lyknes spak to men goynge be the weye.

REX EDWARDUS TERTIUS. [1362-1364.]

Also in this yere, in the kal’ of Juyn, fell a blody reyne in Burgoyn, and a blody crosse apered in the eire fro the morwe unto myd day at Boloyne, the whiche afterward moved hym and fel down into the see. And in this yere prynce Edward wedded the countesse of Kent. And in this yere was the seconde gret pestilence, in whiche good Herry of Lancastre deyde, and Sr. John erle of Richemond, the kynges sone, was mad duke of Lancastre. And in the same yere began the grete companye.

This same yere upon seynt Maurys day, the yere of our lord a mlccclxj, was the gret wynd whiche caste doun tres, houses, pynacles and steplees of chirches and manye places in Engelond. Lyonell the k’ son duke of Clarence.Also this yere Sr. Leonell the kynges sone was mad duke of Clarence, and Sr. Edmond of Wodestoke was made erle of Caumbregg.

REX EDWARDUS TERTIUS. [1364-1367.]

In this yere comen thre kynges into Engelond to vysyte and to speke with kyng Edward; that is to seye, kyng John of Fraunce, the kyng of Scottes, and the kyng of Cipre.

This same yere of oure lord a mlcccmolxiiij was the batell of Orrey in Britayne, where Sr. Charles de Bloys chalanged to be duke John kyng of Fraunce deide at Saveye.
A gret frost that longe dured.of Bretayne was sclayn, and Sr. Bertram Claykyn was take with manye othere lordes and knyghtes. Also this same yere, at Saveye besyde Westm’, deyde John kyng of Fraunce. And also in the same yere was a strong cold frost, whiche endured fro seynt Andrewes day unto the kal’ of Aprill.

This same yere, the vij kal’ of Feverer, Edward the firste sone of prynce Edward was born; whiche in the age of vij yere endyd hys lyf. Also in this yere was grete and stronge batailes of sparwes in Engelond in diverses places, whereof the bodyes were founden in the feldes dede withoughte noumbre. And in this yere manye men and bestes were enfect with pokkes where thorugh they deyden. And in this yere on seynt Barnaby day was Cornwayle hanged.

REX EDWARDUS TERTIUS. [1367-1370.]

In this yere Richard the sone of prynce Edward was born at Burdeux.

This same yere, that is to say the yere of oure lord a mlccclxvij, in the monthe of March appered stella comata. Also in this yere was the bataille of Nazers in Spayne, where prince Edward with his companye scomfyted the bastard of Spayne, and restored kyng Petir ayeyn to his reaume that was put out be the forseid bastard; and there was taken the erle of Dene, Sr. Olyver Claykyn, and manye othere; thankyd be God.

In this yere Sire Leonell duke of Clarence with a fayre meyne sailled over the see toward Melane; whiche aboughte the natyvyte of oure lady the same yere deyde. iij pestilencia.In this yere was the thridde pestilence,[64] in whiche deyde dame Blaunche of Lancastre. And in this yere the Frensshmen meved ayeyn werre.

REX EDWARDUS TERTIUS. [1370-1373.]

In this yere was so gret derthe of corne in Engelond that a busshell of whete was worth xl d. And in this yere was the grete vyage into Fraunce be Sr. Robert Knolles. And in this yere Mortherer of Pembrok in Cristemasse weren at the countesse hous; and the same Mortherer sclewen of men, women, and children in the cradell, xiij; and this was don be a fysshmongre that the countesse hadde founde to scole and brought up of a child. And in this yere, the day of the assumpcion of oure lady, the yere of oure lord a mlccclxix, deyde dame Philip quene of Engelond.

In this yere the houses and gardynes were drowe doun aboughte Poules. And in this yere the duke of Lancastre seiled over the see and rood thorugh Fraunce: and Sr. John Haukewod florysshed that tyme in Lumbardie. And in this yere the prynce with hys wyf and hise meyne comen into Engelond, levynge behynden hym the duke of Lancastre in Gascoigne, and the erle of Cambregge.

In this yere the chaunceller, the tresorer of Engelond, bysshopes, and the pryve seall were discharged of there offyces, and in there stede were put seculere lordes.

REX EDWARDUS TERTIUS. [1373-1375.]

This same yere, at Awrastelynge, John Northwold, mercer, was sclayn at the blak heth, wherethorugh aroos a gret discencion and debate among the craftes of London. And in the same yere the duk of Lancastre and Too cardinalx were sent fro the pope into Engelond for to trete for pes.
A bataill upon the see betuen Englysshmen and Flemynges.the erle of Cambregge come out of Gascoyne into Engelond, and wedded the doughter of kyng Petyr. And the same yere too cardinalx were sent fro the pope to entrete for the pees betwen the two reaumes. And in this yere was a bataill upon the see betwen Englisshmen and Flemynges, where there were taken of Flemynges xxv schippes lade with salt of the bay. Also in this yere the erle of Pembroke was taken at the Rochell be the Spaynardes, on the even of the nativite of seynt John baptiste.

In this yere the duke of Lancastre seiled into Flaundres, and passed be Parys thorugh Burgoyne and alle Fraunce into Burdeux, withoughte ony withstondyng. And in this yere Sire Alex’ Neville was mad erchebysshop of Yorke, and Thomas Arundell bysshop of Ely, maistre Herry Wakefeld bysshop of Worcestre.

REX EDWARDUS TERTIUS. [1375-1377.]

In this yere, at the town of Bruges in Flaundres, was tretyd upon diverses articles hangynge betwen the pope and kyng Edward. Also the same yere was treted at Bruges for the pees betwen the too reaumes. Ladyes ledde lordes bridel.Also in this yere rood dame Alice Perrers, as lady of the sune,[65] fro the tour of London thorugh Chepe; and alwey a lady ledynge a lordys brydell. And thanne began the grete justes in Smythefeld whiche endured vij nyght.

In this yere was the thridde grete pestilence, in whiche dyed the honorable knyght Edward lord Spenser, and lythe beryed at Tewkesbery.

REX EDWARDUS TERTIUS. [1377.]

In this yere, upon Trinite Soneday the viij day of Juyn, withinne the kynges paleys of Westm’ deyde the noble flour of knyghthood, that is to seye, the goode prince Edward, whoos body lith worthily entered at Caunterbury a for yeyns seint Thomas schryne. Also in this yere oon Prentyng of Norfolk was enprisoned in the erles place of Northumbr’, for whiche the peple of London aroos and wolde a sclayn the erle and cast down his place. Also in this yere Richard the sone of prynce Edward was mad prynce of Walys.[66]

In this yere was graunted to the kyng of every persone, man and woman, above the age of xiiij yere, iiij d; and of every man of holy chirche avaunced xij d; and of every man nought avaunced iiij d. freres only except. And this same yere the cardynall of Engelond was smyten with the palsye and loste his speche, and upon Marie Magdaleyne day he dyde. Also in this yere, the xij day of Aprill, Sr. John Mynstreworth knyght was beheded. Also in this yere, in the xij kal’ of Jull, that is for to seye on seynt Albones even, at Schene, deyde the moost excellent and doughted prynce Edward the thridde: the whiche Richard, the sone of goode prynce Edward the sone of the sayde kyng Edward, at the age of xj yere began to reigne: the whiche forsaid kyng Edward lyth ryally entered at Westm’.

NOMINA MAIOR’ ET VICECOMITU’ LONDON’ TEMPORE REGIS RIC’I S’C’DI, QUI CORONATUS FUIT APUD WESTM’ xvij KAL’ AUGUSTI, ANNO D’NI MILL’MO CCCmo lxxvijo, ANNO ETATIS SUE xjo, DURANTE T’M’IO ET ANNO MAIORATUS NICHOLAI BREMBRE ET VICECOM’ SUP’ D’CO ANNO PRIMO.

REX RICARDUS SECUNDUS. [1377-1380.]

In this yere of oure lord a mlcccmolxxviij, in the morwe after seynt Laurence day, was Robert Hawle sclayn in the chirche of Westm’ be Sr. Aleyn Boxley, Sr. Rauf Fereres and Markle, whiche was sithen a sergeaunt of armes. Also the same yere was ordeyned that every persone undirgrowe schulde pay iiij d. to the kyng; and this cause was most cause of the rysyng after, for in Kent they began to serche first maydens and othere.

This yere the parlement was at Northt’; and there was Kirkeby drawe and hanged for the deth of a marchaunt of Jene, and a whit frere was punysshed for wordes that they hadde seyde be the duke of Lancastre. And in this yere were galeys in Thamyse, and brende Gravesende and Tilbury; for which cause Sr. Rauf Ferrers was apeched. And in this yere was the bataill betwen Sr. John of Audeslay knyght, and Thomas Kat’ynge esquyer.

REX RICARDUS SECUNDUS. [1380-1381.]

This yere was the rysyng of the co’es of Essex and of Kent, for a talaye ordeyned that every man and woman betwen the age of lx and xvj yere schulde paye to the kyng xij d.; the whiche comones brenden the chirche and the houses of seynt Jones at Clerkenwelle, and at the Tour hill they beheded maistre Simond Sudbury, than erchebysshop of Caunterbury and chaunceller of Engelond; and frere Robert Hales priour of seynt Jones hous, thanne tresorer of Engelond; and frere William Appulton a grey frere, because he was phisicion to the duke of Lancastre, and Roger Leche sergeaunt of armes; and Richard Lyons was beheded at the standard in Chepe; and Richard Somere was beheded at the Milende; and Legat of Holbourn was beheded at Goterlane ende in Chepe; and manye questmongers, jorours, men of lawe, Flemynges, and othere aliens as they comen to honde they were beheded in diverses places. They brende Saveye.And thise said arrysers brenden the dukes place of Lancastre called Saveye, and wolde fayn an had the duke of Lancastre, but as grace was he myghte not be founden: and this was don on Corpus Cristi day, thanne beynge on the xj day of Juyn the yere of oure lord a mlccclxxxj. And on the morwe after, that is to saye Fryday, and thanne on the Satirday after Corpus Cristi day, the kyng anon after rood into Smythfeld, and William Walworth thanne beynge maire of London, Sr. Robert Knolles and also aldermen and othere citezeins of London with hym: and there they metten with Jake Strawe ledere of the uprysers. And this Jake Strawe spak to the kyng heded as it hadde be to his felawe: and John Blyton that bar the maires swerd of London bad hym don of his hode while he spak to the kyng; wherfore Jake Strawe wax an angred, and mynte to caste his daggere to Blyton. Jake Strawe was sclayn.And thanne William Walworth, maire of London, drewe his baselard and smot Jake Strawe on the hed: and with that, Rauf Standyssh, that bar the kynges swerd, roof Jake Strawe thorugh the body with a swerd; and there he fyll doun ded. And anon his hede was smeten of and sett on a pole. And there the kyng made knyghtes, that is to seye, William Walworth maire of London, Rauf Standyssh, Robert Launde, Nicholl Brembre, Nicholl Twyford, and John Philpot. And anoon they wenten into seynt Jones feld, and there they founden alle the arrysers. And anon they were besett aboughte with the peple of London, so that they might non of them escape away: and thanne the kyng dede crye that no man schulde don them bodyly harme; and they were fayne to escape awey with there lyfves, and left there wepenys behynde them. Nevertheles afterward manye of them weren arrested, and be the lawe don to the deth in diverses schires of Englond, some drawen and hanged, and some hanged, and some beheded.

REX RICARDUS SECUNDUS. [1381-1382.]

This yere kyng Richard wedded quene Anne the emperours doughter of Almaygne, that was a gracious lady. And in this yere of oure lord a mlccclxxxij, in the xxj day of May upon Wednesday anon after noon, was a gret erthequake in Engelond.

REX RICARDUS SECUNDUS. [1382-1385.]

This yere sire Herry Spenser bysshop of Norwich seyled into Flaundres with a croceryd to werre on the Flemynges. In that vyage wente Sr. William Elmham, Sr. William Faryndon, Sr. Thomas Trevet, and othere; and on seynt Urbanes day the pope, there were sclayn besyde Dunkirke xj ml and v hundred Flemynges. Also in this yere fill debate in London betwen John Northampton, William Essex, John Moore, and Richard Norbury on that on partye, and the fysshmongers on the othere partye.

In this yere John Northampton, John More and Richard Norbury were dampned into the tour of London, to be drawe and honged for certeyn congregacion mad ayeyns the pees in the citee of London. And in this yere Sr. Nicholl Brembre was chosene maire of London be stronge hand of certeyne craftes of London.

In this yere were called ayeyne to there ansuere John Northampton, John More, and Richard Norbury in the tour of London, before Sr. Robert Tresylyan justice, and before Sr. John Deverose thanne styward of the kynges houshold, and before Sr. Nicholl Brembre thanne maire of London. Sr. Edmunde Langeley erle of Cambrygge made duke of Yorke.In this yere the kyng at parlement be assent of the comounes made Sr. Edmond Langeley, thanne erle of Caumbregge, duke of Yorke; Sire Thomas Wodestoke, thanne erle of Notyngham, duke of Gloucestre; Sr. Robert le Veer, thanne erle of Oxenford, duke of Irlond; and sitthe he made hym marqwys of Develyn, Sr. Mychel Pole was made erle of Suff’.and yaf hym alle the comodites of Irlond, terme of hys lyf, to mayntene the werres of Irlond: also Sr. Mighell of Pole was mad erle of Suffolke, and Sr. John Urmonde was mad erle of Urmond. In this yere kyng Richard, the duke of Lancastre, with a grete powere redyn into the north, and distroied into the Scottes see. A gret bataill in the palys of Westm’.And in this yere was the bataille in the palys at Westm’, betwen Martigo Novyle of Naverne apeler, and John Walssh defender; the whiche Martigo apeled the said John that he schulde have p’posyd and sold the castell of Chirburgh: the whiche John there hadde the victorye and was mad knyght, and the said Martigo was drawen and hanged. Also in this yere Sr. Nicholl Brembre was chosen maire ayeyne, be the said craftes and be men of the contre at Harowe and the contre there aboughte, and not be fre eleccion of the citee of London as it owith to be: and the oolde halle was stuffed with men of armes overe even, be ordinaunce and assente of Sr. Nicholl Brembre for to chese hym maire on the morwe; and so he was.

REX RICARDUS SECUNDUS. [1385-1386.]

In this yere was a gret rydynge fro the tour of London to Westm’; and evere a lord ledde a ladyes bridell. And on the morwe began the justes in Smythefeld, whiche lasted too dayes. There bar hym well Sr. Herry of Derby, the dukes sone of Lancastre, that othere was the lord Beaumond, the thridde Sr. Simond of Beuerley, the ferthe Sr. Piers Courteneye.[68]

REX RICARDUS SECUNDUS. [1386-1388.]

This yere the erle of Arundell admirall of Engelond faught on the see with the Flemynges, upon oure lady day in lenten, and scomfyted them, and tok manye schippes lade with Rochell wyn; among whiche schippes was oo schipp called Mewes Colman,[69] and that schipp was the admyrall of Flaundres, the whiche was taken and manye othere prisoners. The some of schippes grete and smale, at that tyme take, were lxxxvj schippes, in whiche were accompted xvijm tounes of wyne. Also the duke of Lancastre in this yere, with his duchesse dame Constance, sayled over the see into Spayne with a gret peple, to clayme his wyfves right: and he tok with hym John Northt’, for doughte elles he myghte have be sclayn whiles he hadde ben oughte of the reaume.

In this yere was the rysyng of lordes of Engelond; that is for to seye, Sr. Thomas of Wodstok duke of Gloucestre, Sr. Herry erle of Derby, Sr. Richard erle of Arundell, Sr. Thomas erle of Warrewyk, Moubray the erle marchall, and Sr. Thomas the erle of Notyngham, ayens othere certeyn lordes, that is to weten, Sr. Robert de Veer erle of Oxenford, that was mad markys of Develyn and after duke of Irlond, whiche fledde into Loveyne in Braban, and there he deyde; Sire Mich’ of Pole erle of Suffolk, whiche also fledde to the same place, and there deyde; Sire Alexander Nevyll erchebysshop of York, the whiche fledde to Scotlond, and there deyde; Robert Tresilian the kynges justice and Nicholl Brembre knyght were drawe to Tyborne and hanged. Also the same tyme Sire Johan Beauchamp, Sr. James Diverses knyghtes were hanged, and diverses justices were exiled for everemore.Berners, and Sire Simond of Beuerle, knyghtes, were beheded at the Tour hill; but Sr. John of Salisbury was drawen and hanged; and also Robert Bealknap, John Holt, Robert Cary, William Burgh, Robert Fulthorp, and John Lokton, justices, weren exiled into Irlond, there for to dwelle alle there lyf tyme.

REX RICARDUS SECUNDUS. [1388-1390.]

This yere, in the moneth of May, weren the justes in Smythfeld betwen the erle of Notyngham and the erle of More, Scott.; also betwen the lord Welles and Sr. David Lyndesey, Scott.; also betwen there Nicholl Bemenere and John Bron, Scott.

In this yere were justes betwen Sr. Piers Courtenay and Sr. William Danyell, Scott. And in this yere John Northampton cam home and posseded his goodes.

REX RICARDUS SECUNDUS. [1390-1392.]

This yere was scarcete of corn. Neverthelees the seide meire, be good counseill, sente his men over the see with gold into divers contres and broughte home corn, so that the prys was well amendyd.[71]

whiche John Hende occupied the office of the meire into the morwe after the natyvyte of seynt John baptist, Edward Dalyngreg’ and Baldewyn Radyngton were mad kepers of the citee of London.the whiche was put down be the kyng and his counseill at Notyngham, and ordeyned Sr. Edward Dalyngregy, knyght, kepere of the citee; and on the xxij day of Juyll the said Edward was discharged of his office, and Sr. Bawdewyn Radyngton at Wyndesore was mad kepere of the citee of London, and so stod in office into the feste of seynt Symond and Jude; at whiche day, be leve of the kyng, they chosen officers in the Yelde halle of London for the yere folwyng as it folwith. The remevyng of the court to Yorke.And in this yere the courtes were remeved, and withdrawe fro London to York fro the feste of the nativite of seynt John baptist unto Cristemasse folwynge; and all this disese above seyd was for this cause. In this yere Thomas Arundell erchebysshop of York was thanne chaunceler of Engelond, and Waltham bysshop of Salesbury was thanne tresorer of Engelond; For an hors loof.the serwauntes of whiche tresorer arrered a grete debate in Fletestrete ayens men of the towne for an hors loof, for whiche the tresorer pleyned upon the citee to the kyng, and wykkedly enformed the kyng; thorugh whiche enformacion and procurment of the chaunceler, the kyng sesed the fraunchise and the liberte of London into hys hond: and the kyng hadde of London x ml lib’ or he wolde be plesyd.

REX RICARDUS SECUNDUS. [1392-1396.]

In this yere was the pley of seynt Katerine.[72]