In this yere, in the fest of seynt Michell, the kynges benche and the echeqer were removed fro Westm’ to Schrovesbery, and in the xv day of seynt Hillere next folwynge thei were brought ayeyn to Westm’.

In this yere of oure lord a mlcclxxviij, the kyng of Scotlond come to the kynges parlement at London. Also in this yere, the viij day of seynt Martyn, alle the Jewes of Engelond were taken for clippyng of money: and in the feste of seynt Lucie alle the goldsmythes of London, and alle thoo that kepten the Change, and manye other men of the citee weren arested and taken for beyenge of plates of sylver, and for chaunge of grete money for smal money, whiche were indited be the wardes of the citee. And on the Monday next after the Epithanie the justyces setene at the Yeldhalle to make delivreaunce; that is to seyn, Sr. Stephen of Pencestre, Sr. John of Cobham, and other which that them lust to assocye to them. The hous of the Frere P’chours was founded at Castell Baynard.
The town of Boston was brente 1275 [In a modern hand].And there were forjugged and drawen and hanged iij Englyssh Jewes.[12] And in the same yere the hous of the Frere Prechours began to be founded at Castell Baynard. Also Robert Kylwardby the erchebysshop of Caunterbury in this yere was mad cardenall, and frere John Pecche, a Frere Menour, was thanne made erchebysshop of Caunterbury. And in this yere the town of Booston was brent.

REX EDWARDUS PRIMUS. [1279-1283.]

In this yere the kyng made newe money of silver called half penys and farthynges, alle rounde, of whiche were none sen before. Also in this yere upon seynt Denys day fel A gret snowe.a gret snow, of whiche cam grete floodes and huge. Eod’m anno s’c’us Hugo Lincoln’ ep’us t’nslatus fuit.

This yere Martyn the forthe was sacred pope at Rome.

In this yere the werre aroos ayeyne betwen the kyng and the prynce of Walys upon Palm Sonday; on whiche day David the princes brother tok Sr. Roger Clyfford at Hawardyn, and sclowe and tok manye of his mene, and beseged the castell of Flynt and Rothelan, and tok the toun of Claupautern[13] and caste adowe the walles.

In this yere the kyng with a gret oost wente into Walys and remeved and brak the sege of the castell of Flynt and Rothelan. And in this yere in the iij idus of Decembre, Thlewelyn prince of Walys was sclayn, and his hed smyten of be Sr. Edmond Mortymer, and sente it to the kyng, whiche that tyme lay at Rothelan; and the kyng sente it to London, and comaunded that it schulde be sett upon the tour of London. And that said prynce of Walys before or he was sclayn, come into the landes of the forsaid Sr. Edmond Mortymer, and occupied manye of hise lordschippes, wherfore the said Sr. Edmond manly with meyne fillen on hym as it is before seyd. And it was seid that yif the forseid prince hadde lyved too dayes longere than he dede, alle the Walssh tonge hadde holly ben enclyned to hym. And in this yere, on seynt Leonard day, Sr. Roger Clyfford the yonger was droughned betwen Snowdon and Englessey, and manye othere also, whiche because there myghte nought abyde the comynge of the Walsshe men, unwysly, withoughten hors, passed the bregge of Penbroke.[14] S’cus Thom’ Hereford’ ep’us obiit.Also in this yere deide seynt Thomas the bysshop of Hereford, whiche was called Thomas Cantel’. After hos disses succedyd into the bysshopriche, Richard of Swynfeld.

REX EDWARDUS PRIMUS. [1283-1284.]

In this yere aboughte the feste of Natyvyte of seynt John Baptiste, David the brother of Thlewelyn was taken and holden in pryson at Rothelan, unto the fest of seynt Mighell, and thanne lad to Schrovesbury, and there he was dampned to be ded; and first he was drawen thorugh the citee with hors unto the galowes, thanne hanged, and afterward beheded; and thanne his bowels brent, and the laste his bodye quarterd in iiij quarters, whiche were sent to be sett up in iiij parties in Engelond; and be the kyng comaunded that his hede schulde be seete on the tour of London. And fro that tyme forth the kyng occupied alle the lond of Walys. And thanne he dyvyded it into schires and hundredys, in maner as it is in Engelond; and at Abbercouewe[15] he made a gret and a strong castell, fro whiche place the monkes of Cisteux remeved; and in another place a mancion edified for them. He made there a fair toun, and he lete make the castell of Carnarvan in Snowdon, where that his sone was born: and also he lete make the castell of Plaupautuvouc.[16] The kyng of Aragon occupied the kyngdom of Cecile, and put out kyng Charles.And also in this yere Petir kyng of Aragon occupyed the kyndom of Cecilie, ant putte out kyng Charles, whiche anon after mad an ende of hys lyf; wherfore the pope Martyn accursed the said Petir, and the kyngdom of Aragon he yaf to the kynges sone of Fraunce. And in this yere aroos werre betwen the kyng of Fraunce and the kyng of Spayne; and the kyng of Fraunce with a gret ooste wente into Spayne, whiche dede nothyng worthy to be preysed. Laur’ Doket was hangen in Bowe chirche.Also in this yere Reynold of Lanfare,[17] Robert Pynot, Poule of Stebenhithe, Thomas Corewener, John Tholosan, Thomas Russell, and Robert Scot, weren accused of the deth of Laur’ Doket, whiche was hongen in Bowe chirche: and they were dampned, drawe, and hanged; and on Alyce a woman was brent for the same cause: and Rauf Crepyn, Jordan Gret conduyt in Chepe.Goodcheppe, Gilbert Clerk, and Geffrey Clerk, weren atteynt and sent to prison into the tour of London. Also in this yere the grete conduyt in Chepe was newe begonne to maken.

REX EDWARDUS PRIMUS. [1284-1287.]

This yere upon seynt Petyr day and Poule the fraunchise of London was sesed into the kynges hand; forasmoche as Gregory Rokesby maire yelde up the seal at Berkynge chirche, and toke it to Rauf Asshewy; and thanne was Rauf Sandwych mad wardeyn of the citee. And in this yere the kyng of Fraunce wente into Aragon with a gret powere. Edward the kynges sone was born.Also in this yere Edward the kynges son was borne.[19] And the kyng dwelled in Walys tyl ayens Cristemasse, and he held his Cristemasse at Bristoll.

This yere kyng Philipp of Fraunce com out of Aragon, where he loste the most part of his oost, and deyde: and Philipp his sone was crowned kyng in the feste of the Epithanie. And in this yere deyde kyng Petyr of Aragon. Also in this yere, in the feste of the Nativite of oure lady, Sr. Edmond Mortymer receyved the ordre of knyghthod of kyng Edward at Wynchestre. Also, this seid Sr. Edmond wedded Margarete the doughter of Sire William de Fowles,[20] cosyn to the quene, at Additamenta Glouc’.London. And in this yere were mad at London, the statutes whiche ben seid additamenta Glouc’.

In this yere, alle the Jewes of Engelond were put to a gret tribute, to be payed to the kyng. Also this yere the kyng passed the see into Fraunce, aboughte the Invencion of the Holy Cross; and of the kyng of Fraunce he was worthyly resceyved, and so yorned a certeyn time with the kyng of Fraunce at Parys, whiche yald up certeyn londes of Gascoigne to the kyng Edward, whiche long tyme hadde wrongfully be withholden out of his handes. Grete haylstones.Also in this yere, in the March of Walys fel the grettest hailstones that evere were seyn in that countre, whiche dede grete harme to beestes and to houses and to corn.

REX EDWARDUS PRIMUS. [1287-1290.]

This yere seynt Thomas of Hereford was translatyd. Also, aboughte Pentecost, Rys ap Geredith began partie ayeyns the kynges pees, and werred in the kynges londes.

This yere was so gret plente of whete that men solden a quarter of whete for xvjd. And in this yere was a passyng hoot sommer, and specially in hervest.

This yere kyng Edward cam out of Gascoigne into Engelond upon oure lady day, the Assumpcion. And in this yere Sr. Thomas Weylond justice, Adam of Skretton, and alle moost alle other justices were convicte of false domes yevynge, and grevously punysched; some of lesyng and forfaityng of alle there goodes, and some be redempcion of moche money.

REX EDWARDUS PRIMUS. [1290-1292.]

In this yere alle the Jewes were exiled out of Engelond, to voyde the reaume of Engelond be Alhawen tyme, upon peyne of lesynge of there heedes or eny of them mighte be founden withinne the reaume; The vth of ther moveable goodes.and for to have this graunted of the kyng don and performed, the co’es of the reaume grauntyd for to yeve the kyng the V parte of there moveable goodes. This same yere Gilbert the erle of Gloucestre wedded dame Johanne the kynges doughter. And in this yere forthwith the dukes sone of Braban wedded dame Margrete the kynges other doughter. Obiit regina Elianora.And in this yere, on seynt Andrew even, deyde quene Elianore kyng Edward wyf. Also in this yere aroos a grete stryf betwen the V Portus and Flaundres. The staple of wolles was ordeyned at Sandwych.Also this yere the kyng ordeyned the newe feyre and market at Sandewych, where alle the wolles of Engelond schal be brought, and there sold.

In this yere Acres was wonne of the Sarasynes the xv day of Maii, and utterly destroid, and alle tho that dwelden withinne that myghte be founden were sclayn. Natheles manye escapid awey be schippes. Also quene Elianore the kynges modyr deyde. And in this yere the kyng prisoned his sone for mayntenaunce of diverses traitoures.

REX EDWARDUS PRIMUS. [1292-1294.]

In this yere the kyng of Scotlond come to the kynges parlement to London. Also that type iij men token away too prisoners fro Baskle seriaunt of London; wherfore the ryghte handes of the same iij men weren smyten of at the Standard in Chepe. mors.Also in this yere, iiij nonas April, deyde pope Nicholas. mors.Also in this yere deyde Sr. Robert Burnell bysshop of Bathe, and thanne chaunceler of Engelond. mors.Also in this yere frere John Pecche erchebysshop of Caunterbury deyde. And in this same yere anon after Whitsonday, the justices of eyr saten at Hereford. And in this yere anon after the feste of seynt Michel, they saten at Schrowesbury.

In this yere fel the grettest snowe that evere was seyn before this tyme; wherfore a vercyfyer made in metre thise vers:

And in this yere the erle of Barre wedded dame Elianore the kynges doughter at Bristoll, aboughte the Exaltacion of the Holy Crosse.

REX EDWARDUS PRIMUS. [1294-1296.]

In this yere was a gret rysyng in Walys, wherfore the kyng wente into Walys and made pees and reeste. Also the townes of Bloy and Bayone werre wonne be Sr. John Seynt John and other worschepful bachelers of Engelond. The Normanes arryved at Dovorre.Also the same yere the Normaunes arryved at Dovorre and brent a gret part of the towun and martyred an holy man that was clepyd Seynt Thomas of Dovorre: but the Normaunes were sclayn every modir sone, ther eschapid none. Also in this yere the kyng was defraunded of his lond in Gascoigne in this manner, sothly: the kyng hadde yoven the forseyd lond of Gascoyne to the kynges suster of Fraunce, for that sche schulde be yoyned to hym in fre mariage, and be some of his counseill enfeffed here in the sayd lond of Gascoigne; whiche lond of Gascoigne sche yaf to Charles here brother and to other, and the matrymoigne betwen here and kyng Edward sche sette at noughte, and wolde noughte stonden therto. Wherfore kyng Edward sente hyse ambassatours to the kyng of Almaigne, Spayne, and of Aragon, and to manye other dukes and erles beyonde the see, preyenge and askynge counseill and helpe of the seid matier: of whiche some because of affynyte and for yeftes yeven, and some for good and faire beheste of yeftes, graunted the kyng his axynge.

In this yere the kyng lete areste alle the wolles of Engelond, wolle felles and hydes; and he tok to hym alle the money to hym graunted of the pope in subsidie of the holy lond, and collecto’s[22] of the same dysme thorugh Engelond, and he dede for to be born to London into his Eschequer: also the convocacion of the clergye of alle Engelond beynge at London the Wednesday nest after the fest of seynt Mathy, the kyng asked a gret some of the clergye toward his werres whiche he hadde with diverses regiones and provynces; The clergye of Engelond graunted moche good to the kyng for his werres.
And the lay peple graunted the x p’t of there goodes.and the clergye graunted hym halven dele there goodes sp’uelx and temp’elx, oughtake benefices not passynge x marc: and the said taske the kyng let gadere at iij tymes evenly of the yere. Also in this yere[23] the kyng hadde of lay peple of Engelond the x part of there goodes, whiche he let gadere at two tymes of the yere be even porcions. The same yere the werre aroos betwen the kyng and the Walssh peple, in whiche werre was sclayn greet multitude of peple: and that werre began aboughte the feste of seynt Cosine and Damyan. And in this yere a worthy marchaund callyd Laurence of Lodolowe was dreynt in the see to Flaundres ward. Also in this yere Sr. Thomas Turbevyle for treson was drawen and hanged. And in this yere Sire John Seynt John discomfyted the erle of Artoys; but in the seconde bataile the said Sr. John was taken and enprisoned in Fraunce. And in this yere Sr. Herry Mortymer resceyved the ordre of knyghthoode at Portesmouth. Also this same yere the kyng Edward, magre alle the Scottes of Scotlond, xxv ml and viiic Scotts.he toke the toun and the castell of Berewyk, and killed there xxv ml and viij c Scottes; and there were taken Sr. William Douglas, Sr. Symond Freshell, and the erle Patryke. And in this yere, that is to sey the yere of oure lord a mlcclxxxxvij, The kyng tok the castell of Edenburgh with alle the regalies of Scotlond.the kyng tok the castell of Edenburgh, where he fond the regalyes of Scotlond, that is to seye the kynges see, his crowne of gold, and his ceptre, whiche regalyes the kyng offred sithens to seynt Edward at Westm’, in the morwe after seynt Bothulphes day: and at Myssomer, John Bailhol kyng of Scotlond come to the kynges pees to London. Also this yere Edward the kynges sone was admirall upon the see.

REX EDWARDUS PRIMUS. [1296-1297.]

This yere the kyng lete gadere in Engelond in diverses schires an hundred thousand quarters of corn, and sente it over the see into Gascoigne: and the kyng passed the see in August, and with hym xxti ml[24] Walsh men and too ml Englysshmen and too ml Irysshmen; and there aroos a stryf betwen the kyng and his lordes, that non of them wolde passen with hym over the see; and the kyng arryved in Flaundres: and there was taken trewes for too yere betwen kyng Edward and kyng Philipp of Fraunce; and Sr. John Seynt John and other prysoners were frely delyvered out of pryson.

In this yere, in the feste of seynt Andrew, the kyng graunted to the lordes all there axynge of the poyntes of the olde chartre: also the Scottes areysed werre ayeyns the kyng of Engelond: also the viij day of Paske, Thomas Romayn, Richard Romayn,[25] Richard Gloucestre, Nicholl Faryndon, Adam Halyngbery, Thomas Cely, John Dunstale, Richard Asshwy, John Wade and William Storteford, weren aresteed for brekyng of the toune in Cornhull. And in the viij day of May[26] in this yere the kyng faught with the Scottes at Fowkyrk, in which bataile xxiij ml[27] Scottes were sclayn, and of Englysshmen but xxviij, honoured be the highe Godes grace.

REX EDWARDUS PRIMUS. [1298-1300.]

This same yere the fraunchise of London was graunted ayeyn for ij ml marc, whiche was sesed ayeyn into the kynges hond; and for to make leve of that some, the servauntes bowys in the citee were sette at the tallage as well as the maistres. Also in this yere men of London wenten and sercheden the chirche of Seynt Martyns in the feld for tresoure of gold, thorough the wordes of a gardyn’, whiche seyde how there was a gold hord; but they founde nought: wherfore the dene of Poules of London, be comaundement of the erchebysshop of Caunterbury, denounced them alle accursed openly at the Crosse of Poules that sergeden as above seyd. A maryage betwen the kyng and Margarete the kynges sust’ of Fraunce.
He wan all Scotland.Also in this yere Robert Wynchelsee erchebysshop of Caunterbury spoused the kyng Edward and Margarete the kynges suster of Fraunce togidere: and also pees was mad betwen bothe kynges. And in this yere the kyng wente the thridde tyme beyounde the see into Scotlond, and thanne wan it alle.

This yere come the kyng to London and ordeyned the Trailbaston, whiche wente thorough the reaume, and arrered therby moche tresour. And this yere quene Margarete com into Engelond.
The kyng enprysoned his sone Edward.And in this yere the quene Margarete com into Engelond; and the citeizens of London reden ageine here in good aray, abought cc persones atte the leeste. Also this yere the kyng enprysoned his sone Edward, because that Waulter Langeton bysshop of Chestre hadde compleyned that the forsaid Edward, be counseill of Pers of Gavaston, esquyer of Gascoigne, hadde broken his parkes; and forasmoche as the said Edward the kynges sone was ladde and governed be the said Pers, the kyng dede exile the forseid Piers for evere.

REX EDWARDUS PRIMUS. [1300-1304.]

In this yere the kyng held his parlement at Caunterbury, and the werre aroos betwen the kyng of Fraunce and of Flemynges.

This same yere, that is for to seye the yere of oure lord a mlcccv, were alle the Templers distroyd in oo day thorugh out alle Cristendome.

REX EDWARDUS PRIMUS. [1304-1307.]

In this yere William Waleys, that was sworne liege man to the kyng of Engelond, presented hymselfe to be kyng of Scotlond, and rebelled ayens kyng Edward: nevertheles he was taken and sent to London, where he was dampned, drawen, and hanged and beheded, and his bowels brent and the body quarterd; and his hede sette upon London brigg, and hys foure quarters sent into the foure beste townes in Scotlond: and this was don upon seynt Bertilmewes even. A parlement at Westm’.
R. le Bruz.And in the fest of seynt Myghell the kyng held his parlement at Westm’; to the whiche parlement come ought of Scotlond the bysshop of seynt Andrew, Robert le Bruz erle of Caryk, Simon Frysell, and John erle of Athelles, whiche weren sworne to be trewe lieges to kyng Edward.

This yere Robert Bruz made hym kyng of Scotlond, and Sr. John Comyn was sclayn atte Grey Freres in Donfres, because he wolde not falsen his othe that he made to kyng Edward; wherefore the kyng sente after alle the bachellarye of Engelond that thei schulde comen to Westm’ at Whitsontyd thanne nest folwyng; and there he doubbed cclxxx knyghtes: and the Fryday[28] nest before the assumpcion of oure lady, the kyng mette with Robert le Bruz be syde seynt Jones towne, and killed of his meyne vij ml; and Robert le Bruz fledde: and Simond Frissell was take, and on oure lady even the Nativite he was drawen and hanged at London, and beheded. Bysshoppe of Boston.And in the forsaid bataille were taken the bysshop of Boston, the bysshop of seynt Andrewes, the abbot of Stone, alle armed, whom the kyng sente to the pope, to do with them what he wolde. Also Sr. John the erle of Athelles was taken also at the same bataille; and at the request of the quene, because he claymed kynrede of kyng Edward, his drawynge was relesed; nevertheles he was Bisshoppe of Burdeux made pope.honged and his body brent alle to asshes. And also in this yere the erchebysshop of Burdeux was mad pope.

In this yere deyde the noble and most doughted prynce kyng Edward the firste, in the day of translacion of seynt Thomas of Caunterbury, whos body lith worthyly entered at Westm’.

Transcriber’s Note: Edward I actually died in 1307, the 36th year of his reign.

NOMI’A MAIOR’ ET VICECOMITU’ LONDON’ TEMPORE REG’ EDWARDI SECUNDI DE CARNARVAN’, QUI CORONATUS FUIT APUD WESTM’ Xmo KAL’ MARCII[29] ANNO D’NI MILL’MO CCCmo vijo.

REX EDWARDUS SECUNDUS. [1307-1308.]

This yere the kyng Edward wente into Fraunce and wedded Isabell the kynges doughter of Fraunce, the xv day of Januer’, in oure lady chirche at Boloigne; and the xx day Fever’ sche was crowned at Westm’: and there was so gret prees of peple that Sr. John Bakwell was crowsed to the deth. Also in the same yere the kyng anon after the deth of his fadir sente into Gascoigne for Pers of Gavaston; and he yaf hym the lordschipe of Walyngford and the erledom of Cornuwayle: and this same yere prophecyed the chanon of Bridlyngton.

REX EDWARDUS SECUNDUS. [1308-1312.]

In this yere the schirreves of London paid for the accomptes of London and Middlesex ccccli. Also in this yere, that is to seye the yere of oure lord a ml cccmo xmo, the ordre of Templers were distroid on oo day thorugh alle Cristendome, whiche ordre began in the yere of oure lord a ml lxxxxviij. Also in the same yere began the ordre of Paulyns, that is to say Crowched Freres.

In this yere was borne the kynges sone Edward at Windesore.

REX EDWARDUS SECUNDUS. [1312-1315.]

This yere of oure lord a ml cccxiiij the kyng Edward with a ryall oost wente into Scotlond; and upon Missomer day faught with the Scottes at Strywelyn; and there he was discomfited and fledde, and moche of his peple sclayn.

In this yere it befell that there was a rebaude called John Tannere, the whiche wente aboughte and seyde that he was the goode kyng Edward sone, and called hymself kyng Edward of Carnarvan, and seide thorugh necligence of his noryce, whil he lay in his cradel a sowe com in and foule rente hym, and the noryce durste nought tellen it, but toke a tannere sone[36] and kepte hym in hys stede, and so he was putt to kepyng of another noryce, be whiche he was preved of his rewme: and for to make this the more certeyne to be belevyd, he schewed the places of the woundes which that he seyde the sowe hadde mad. And he seyde that kyng Edward maners were acordyng with the maners of his fadyr the water-berere,[37] for as moche as he loved swyche rude werkes: and for this seyenge moche peple yaf credence to hym and leved his wordes. Also the same John Tanner chalangyd the chirche of the Frere Cannes at Oxenford, whiche was somtyme the kynges halle, and kyng Edward hadde yeve it to them to make thereof there chirche. But natheles at the last he was preved fals, and was taken and brought to Northampton, and there he was drawen and hanged; and before that he was put to his penaunce he confessed before the peple that the devell be hyghte hym that he schulde be kyng of Engelond, and knowloched that he hadde served the devell iij yere and more.

REX EDWARDUS SECUNDUS. [1315-1317.]