Vous qui en ceste pourtraicture
Veez dancer estaz diuers
Pensez que humaine nature
Ce nest fors que viande a vers
Ie le monstre: qui gis en vers
Si ay ie este roy couronnez
Telz serez vous bons & peruers
Tous estas: sont a vers donnes

Rien nest domme qui bien y pense
Cest tout vent: chose transitoire
Chascun le voit: par ceste danse
Pource vous qui veez listoire
Retenez la bien en memoire
Car homme & femme elle amonneste
Dauoir de paradis la gloire
Eureux est qui es cieulx fait feste

Bon y fait penser soir & main
Le penser en est prouffitable
Tel est huy: qui mourra demain
Car il nest rien plus veritable
Que de mourir: ne moins estable
Que vie domme. on laparcoit
A leul pour quoy nest pas fable
Fol ne croit iusques il recoit

Mais aucuns sont a qui nen chault
Comme sil ne fust paradis
Ne enfer. helas il auront chault
Les liures que firent iadis
Les sains: le monstrent en beaux dis
Acquitez vous qui cy passes
Et faictes des biens: plus nen dis
Bien fait vault moult es trespasses

Ouure tes yeux creature chetiue
Vien veoir les fais de la mort exessiue
De qui iay eu en ce lieu vision
Pensee nest si trescontemplatiue
que dauoir en vne heure hastiue
Vng tel regard neust admiration
de trois corps mors mest lapparition
Venue yci auecques leurs suaires
Pareillement leurs terribles viaires
deffigures & leurs corps descouuers
les trous des yeux et du nes ouuers
les os tous secz/ iambes/ bras/ pieds & mains
Tous demengies & partuises de vers
cest le tribut que mort doit aux humains

terrible mort sus tous autres terribles
on te doit bien par tes euures horribles
dire & clamer puis que par ta morsure
et par assaulx soudains imperceptibles
par coups mortelz diuers irremissibles
Telle tu fais humaine creature
de tes euures ay veu la pourtraicture
Tant diuerse tant cruelle et hideuse
Deffiguree/ horrible/ merueilleuse
deuant mes yeux en ce poure hermitage
qui mont trouble tellement le corage
que plus ne peut de tel euure congnoistre
bien doit penser a la mort qui est sage
car en la fin il nous conuient telz estre

Or ne scet on si ces trois autreffois
ont este ducs/ barons/ contes ou roys
papes abbes cardinaulx ou chanoines
ne qui estoit le plus noble des trois
silz ont este bossus hommes ou drois
silz ont este preuosts ou capitaines
fors quilz ont eu tous trois faces humaines
qui ont este en la terre ammurees
La ou les vers les ont deffigurees
Si quil nya plus rien que lossement
Qui est a tous grant esbahissement
et est bien fol a qui point nen souuient
Grans et petis vniuersellement
Vne fois telz estre nous conuient

De lautre part sont venus vis a vis
sur iii cheuaux iii biaux homes tous vis
mais en voyant ceste chose admirable
Il a semble quilz ont este rauis
Trop long seroit a conter le diuis
des trois viuens piteux & lamentable
celui neut deux qui ne fust doubtable
de veoir les mors & non pas sans raison
car quiconque veoit feu en la maison
de son voisin prochain mettre & getter
de la sienne par cause doit doubter
dont les viuens que les mors aperceurent
merueille nest si de fort sespouenter
a celle heure cause raisonnable eurent

les mors aux vis les vis au mors parlerent
& aux viuans les iii mors reuellerent
de mort les grans & terribles assaulx
et tellement les viuens espoenterent
que a bien petit que tous ne trebucherent
a la terre de dessus leurs cheuaulx
lung laissa chiens & lautre ses oyseaux
en requerant a dieu grace & mercy
que requerir nous lui deuons aussi
en lui priant par sa saincte puissance
quil nous donne faire vraye penitance
si que au monde que nous sommes mortelz
nous facons tant que ayons la ioyssance
apres la mort des regnes immortelz

Se nous vous aportons nouuelles
Qui ne soient ne bonnes ne belles
A plaisance ou a desplaisance
Prendre vous fault en pacience
Car ne peut estre autrement
Beaux amis: tout premierement
Non obstant quelque richesse
Puissance/ honneur/ force ou ieunesse
Nous vous denoncons tout de voir
Qui vous conuient mort receuoir
Vne mort las: si douloureuse
Si amere: si angoisseuse
Que les mors qui en sont deliure
Ne vouldroient iames reuiure
Pour morir encor de tel mort
Et apres quant vous seres mort
Tout ainsi que poures truans
Vous seres hydeux et puans
Des nostres/ et de noz liurees
Et voz ames seront liurees
Ie nen dis plus mais cest du pire
Il me souffist asses de dire
De voz meschans corps la misere
Qui ne sont pas dautre matiere
Certainement ne que nous sommes
Na guiere estions puissans hommes
Or sommes telz comme voyes
Se vous voules si pouruoyes
Et bien y deuez pourueoir
Quant en nous vous pouez veoir
Comme de vous il aduiendra
Et quel loyer mort vous rendra
Car voz corps qui sont plains dordure
Aller fera a porriture
Telz comme vous vng temps nous fumes
Telz seres vous comme nous sommes

Pouruoyez y se vous voules
Autrement que vous ne soules
Car certes la mort vous espie
Pour vous oster des corps la vie
Plus briefuement que ne cuides
Qui estes si oultrecuides
Que pour vng peu de ioye vainne
Vng peu de plaisance mondaine
Qui est de si courte duree
Tost venue: plus tost alee
Voulez perdre la ioye fine
De paradis qui point ne fine
Et qui pis est damnes seres
Aultrement nen eschaperes
Mais se sera sans deliurance
Comme auez vous a tel plaisance
Dictes nous: meschans orguilleux
En ce monde si perilleux
Ou il nya que diuisions
Et diuerses tribulations
Puis guerre. puis mortalite
Tousiours nouuelle aduersite
Reuient auant que lautre faille
Vous ne scauez homme sans faille
Tant soit puissant: veille ou non vueille
Qui ne seuffre. qui ne se deule
Ailleurs doncques repos queres
Car cy point ne la trouueres
Repos aures en paradis
Si croire vous voules es dis
Des sages qui conseillent faire
Ce que faire est necessaire
Pour laquerir et pour lauoir
Rien mieulx nully ne peut auoir
Faictes des bien plus que poues
Autre chose nemporteres

O folle gent mal aduisee
Que ie voy ainsi desguisee
De diuers habis: et de robes
Et dautres choses que tu robes
Tant puante charongne a vers
Et prens de tort & de trauers
Ne il ne te chault dou te vienne
Mais que ton estat se maintiegne
Quant ie reuoy tes faulx delits
De vin/ de viande/ de lis
Les grans exces. les grans oultrages
Dont ceulx qui font les labourages
Aux champs. & pour toy se trauaillent
Tous nus: & de fain crient & baillent
Quant ie voy tel gouuernement
Ie doubte que soudainement
Dieu telle vengeance nen face
Que vous nayez temps ne espace
Seulement de crier mercy
Cuidez vous tousiours regner cy
Folz. meschans de male heure nez
Qui en ce point vous demenez
Nenny nenny vous y mourrez
Faictes du pis que vous pourres
Lors aures pardurable vie
Bonne ou male: nen doubtez mie
Dieu est iuste il payera
Chascun selon ce quil fera
Faictes des biens nattendez pas
Que ceulx dapres vostre trespas
Pour vous en facent quamez chier
Qui ne vous vouldroient aprocher
En la terre vous porteront
Et tost apres vous oublieront
Et telz cuidez vos bons amis
Qui sont vos plus grans ennemis

O saincte croix par ta puissance
Dont ie voy la remembrance
Garde mon corps & ne consens
Que ie perde au iourdui le sens
Pour ceste gent hideuse et morte
Qui telz nouuelles nous aporte
Nouuelles dures et peruerses
Las: entre les choses diuerses
Touchant nostre fragilite
De quoy nous ont dit verite
Mon poure cueur de paour tremble
Quant trois mors ainsi vont ensemble
Deffigures/ hydeux/ diuers
Tous pourris & menges de vers
Le premier dit: bien men sonuient
Que mort endurer nous conuient
A grant angoisse et grant douleur
Dont il me fist muer couleur
Et des ames dist vne chose
Que declarer ne veult ne nose
Ie croy cest de leur damnement
En enfer pardurablement
Telz nouuelles ne sont pas bonnes
Helas nous chetiues personnes
A quoy nous fist oncques dieu naistre
En ce meschant monde pour estre
Si tost liurez a tel ordure
De ma vie nauray plus cure
Quant ie voy que les gens qui viuent
Tant de maleurte ensuiuent
Que ie prise trop mieulx asses
Le poure estat des trespasses
Car tousiours sans fin durera
Ou cellui des vifs finera
Et en lestat qui tousiours dure
Chascun viure doit mettre cure

Est ce doncques a bon essiant
Que la mort nous va espiant
Et qui nous fault ainsi mourir
Nest il homme qui secourir
En puist. pour or ne pour argent
Helas: conuient il ieune gent
A tel horriblete venir
Oncques ne men peut souuenir
Mais ie voy bien que cest acertes
Ie voy les enseignes appertes
De mort passerons les destrois
Et deuenrons comme ces trois
Cest la fin de nostre besongne
Helas helas. meschant charongne
Mes que tu faces tes plaisirs
Tes volentes tes faux desirs
Il ne te chault du remenant
Or veons nous bien maintenant
Que par toy nous sommes deceu
Qui iusques a cy te auons creu
Et de nos ames peu te chault
Se elles ont ou froit ou chault
Fy: charongne qui rien ne vault
Tu aimes mieulx les grans cheuaulx
Les beaux habits si peu durables
Et telles choses corrumpables
Pour toy meschant corps & rebelle
Que tu ne fais vne ame belle
Et si sces bien que tu mourras
Et en la terre pourriras
Ou lame pardurablement
En ioye viura: ou en tourment
Pensons doncques si bien finer
Que en ioye puissons finer
Bon y fait penser quant on peut
Souuent on ne peut quant on veult

Certes cest bien dit mais au fort
Il nya point de desconfort
Tous nous conuient passer ce pas
Et croy que dieu ne nous hait pas
Mesbeaux seigneurs & beaux amis
Quant ces troys mors nous a transmis
Qui donne nous ont congnoissance
De la mort & de la meschance
Qui nous vient finer nostre ioye
Helas iamais ie ne cudoye
Que ce temps cy nous deust faillir
Ne que mort osast assaillir
Telz gentilz gens comme nous sommes
Mais ie voy bien que riches hommes
Sont telz & de nulle vallue
Ne plus ne moins que gent menue
Nen parlons plus cest tout neant
Maintenant ie suis cler voyant
Que la ioye du monde est brefue
Et la fin delle point ne griefue
En enfer est horrible peine
En paradis a ioye plaine
Sur toute ioye delectable
Et lune & lautre est pardurable
Or ensuiuons ie vous emprie
Desormais la meilleur partie
Fol est qui choisist & depart
Quant il eslist la pire part
Deux voies auons deuant nos yeulx
Nous qui viuons ieunes & vieux
Vne a ioye. et repos maine
Lautre a tourment & a peine
Pour ioye et repos auoir
Bien fault faire doit on scauoir
Qui mal fait & ne se repent
Il aura peine & tourment

Las: & pour quoy prens tu si grant plaisir
Homme abuse plain de presumption
en ce faulx monde. ou na que desplaisir
Enuie/ orgueil/ guerre et discension
Bien maleureuse est ton affection
Que pense tu: as tu plus grant enuie
de viure en doubte en ceste courte vie
qui les mondains a la mort denfer maine
cest bone chose de viure en vie certaine
Las tu sces bien: si tu nes insensible
Que cest chose forte. voire impossible
De auoir sa ius ton aise entierement
Et apres mort la sus pareillement
Helas: pourtant change condition
Et te rauise. ou tu es autrement
Homme deffait et a perdition

Lequel veux tu ou mort ou vie choisir
Choisir des deux tu as discretion
Ayme tu mieulx de ton corps le desir
Pour ton ame mettre a damnation
Que viure vng peu en tribulation
Et que apres mort ton ame soit rauie
En gloire es cieulx: qui de nul deseruie
Estre ne peut en ceste vie humaine
Si ne lesse terre: auoir et demaine
Et pere: & mere: & tout sil est possible
et viure en peine. et en labeur terrible
en seruant dieu tousiours paciemment
Cest le chemin qui conduit seurement
Apres trespas lomme a saluation
et qui va autrement: il va a damnement
Homme deffait et a perdition

Cuide tu cy tousiours auoir loisir
Dauoir pardon sans satisfaction
et toute nuyt en blanc lit mol gesir
Puis a ce iour sans operation
Passer le temps en delectation
tant que du tout la char soit assouie
Pense tu point quil faille quon deuie
et que prengne fin puissance mondaine
helas oy: car mort viendra soudaine
vne heure a toy auec son dart horible
Si tresacop comme chose inuisible
Que pas nauras loisir aucunement
De dire a dieu: peccaui seulement
Ainsi mourras tost sans contriction
dont tu seras par diuin iugement
Homme deffait et a perdition

Homme en peril saches certainement
que se tu nas autre vouloir brefment
De tamender: nautre deuotion
Tu te verras vng iour subitement
Homme deffait et a perdition

Arte noua pressos si cernis mente libellos
Ingenium tociens exuperabit opus
nullus adhuc potuit huius contingere summum
ars modo plura nequit: ars dedit omne suum

Vir fuit istud opus quod conditor indicat huius