[La danse macabre historiée et augmentée de plusieurs nouveaux personnages et beaux dits]

O creature raisonnable
Qui desires vie eternelle
Tu as cy doctrine notable
pour bien finer vie mortelle
La dance macabre sappelle
Que chascun a dancer aprent
A homme et femme est naturelle
Mort nespergne petit ne grant

En ce mirouer chascun peut lire
Qui li conuient ainsi danser
Saige est cellui qui bien si mire
Le mort le vif fait auancer
Tu vois les plus grans commencer
Car il nest nul que mort ne fiere
Cest piteuse chose y penser
Tout est forge dune matiere

Vous qui viuez certainement
Quoy quil tarde ainsi danseres
Mais quant/ dieu le scet seulement
Auisez: comme nous vous feres
Dam pape. vous commenceres
Comme le plus digne seigneur
En ce point honnoure seres
Au grant maistre est deu lonneur

Hee: fault il que la danse maine
Le premier: qui suis dieu en terre
Iay eu dignite souueraine
En leglise comme saint pierre
Et comme autre mort me vient querre
Encor point mourir ne cuidasse
Mais la mort a tous maine guerre
Peu vault honneur qui si tost passe

Et vous le non pareil du monde
Prince & seigneur grant emperiere
Laisser vous fault la pomme ronde
Armes/ ceptre/ timbre/ baniere
Ie ne vous lairray pas derriere
Vous ne pouez plus seignourir
Ien maimne tout cest ma maniere
Les filz adam fault tous mourir.

Ie ne scay deuant qui iappelle
De la mort: qui si me demaine
Armer me fault de pic de pelle
Et dung linceul/ ce mest grant peine
Sur tous ay eu grandeur mondaine
Et morir me fault pour tout gaige
Quest ce de ce mortel demaine
Les grans ne lont pas dauantaige

Vous faictes lesbahy se semble
Cardinal: sus legerement
Suiuons les autres tous ensemble
Rien ny vault esbahissement
Vous aues vescu haultement
Et en honneur a grant diuis
Prenez en gre lesbatement
En grant honneur se pert laduis

Iay bien cause de mesbahir
Quant ie me voy de si pres pris
La mort mest venue assaillir
Plus ne vestiray vert ne gris
Chapeau rouge: chape de pris
Me fault laisser a grant destresse
Ie ne lauoye pas apris
Toute ioye fine en tristesse

Venez noble roy couronne
Renomme de force & prouesse
Iadis fustes enuironne
De grans pompes de grant noblesse
Mais maintenant toute haultesse
Lesseres: vous nestes pas seul
Peu aures de vostre richesse
Le plus riche na qun linceul

Ie nay point apris a danser
A danse & note si sauuaige
Las on peult bien veoir & penser
Que vault orgueil/ force/ lignage
Mort destruit tout cest son vsage
Aussi tost le grant que le mendre
Qui moins se prise plus est sage
En la fin fault deuenir cendre

Patriarche pour basse chiere
Vous ne poues estre quite
Vostre double croix quauez chiere
Vng autre aura: cest equite
Ne pensez plus a dignite
Ia ne serez pape de romme
Pour rendre compte estes cite
Folle esperance decoit lomme

Ie voy bien que mondain honneur
Ma deceu: pour dire le voir
Mes ioyes a tourne en douleur
Et que vault tant donneur auoir
Trop hault monter nest pas scauoir
Hauls estas gastent gens sans nombre.
Mais peu le veulent parceuoir
A hault monter le fais encombre

Cest de mon droit que ie vous maine
A la dance gent connestable
Le plus fort: comme charlemaigne
Mort prent: cest chose veritable
Rien ny vault chiere espouentable
Ne forte armeure en cest assault
Dun cop iabas le plus estable
Rien nest darmes quant mort assault

Iauoye encor intention
Dassaillir chasteau: forteresse
Et mener a subiection
En acquerant honneur/ richesse
Mais ie voy que toute prouesse
Mort met abas: cest grant despit
Tout lui est vng: doulceur rudesse
Contre la mort na nul respit

Que vous tirez la teste arriere
Archeuesque tirez vous pres
Auez vous paour quon ne vous fiere
Ne doubtez. vous venrez apres
Nest pas tousiours la mort empres
Tout homme & le suyt coste a coste
Rendre conuient debtes & prestz
Vne fois fault compter a loste

Las ie ne scay ou regarder
Tant suis par mort a grant destroit
Ou fuiray ie pour moy aider
Certes qui bien la congnoistroit
Hors de raison iamais nistroit
Plus ne gerray en chambre painte
Mourir me conuient cest le droit
Quant faire fault cest grant contrainte

Vous qui entre les grans barons
Auez eu renom cheualier
Oubliez trompettes. clarons
Et me suiuez sans sommeiller
Les dames soulies reueiller
En faisant dancer longue piece
A autre dance fault veiller
Ce que lung fait lautre depiece

Or ay ie este auctorise
En plusieurs faitz & bien fame
Des grans & des petis prise
Auec ce des dames ame
Ne oncques ne fu diffame
A la court de seigneur notable
Mais a ce cop suis tout pasme
Dessoubz le ciel na rien estable

Tantost naurez vaillant ce pic
Des biens du monde: et de nature
Euesque. de vous il est pic
Non obstant vostre prelature
Vostre fait gist en auanture
De vos subietz fault rendre compte
A chascun dieu fera droicture
Nest pas asseur qui trop hault monte

Le cueur ne me peult esiouir
Des nouuelles que mort maporte
Dieu vouldra de tout compte ouyr
Cest ce que plus me desconforte
Le monde aussi peu me conforte
Qui tous a la fin desherite
Il retient tout: nul rien nemporte
Tout ce passe fors le merite

Auancez vous gent escuier
Qui scauez de dancer les tours
Lance porties et escu hier
Et huy vous finerez vos iours
Il nest rien qui ne praigne cours
Dansez & pensez de suiuir
Vous ne pouez auoir secours
Il nest qui mort puisse fuyr

Puis que mort me tient en ses las
Au moins que ie puisse vng mot dire
Adieu deduis: adieu soulas
Adieu dames plus ne puis rire
Pensez de lame qui desire
Repos: ne vous chaille plus tant
Du corps: qui tous les iours empire
Tous fault mourir on ne scet quant

Abbe: venez tost vous fuyes
Nayez ia la chiere esbahie
Il conuient que la mort suiuez
Combien que moult lauez haye
Commandez a dieu labbaye
Qui gros & gras vous a nourry
Tost pourrires a peu daye
Le plus gras est premier pourry

De cecy neusse point enuie
Mais il conuient le pas passer
Las or nay ie pas en ma vie
Garde mon ordre sans casser
Gardez vous de trop embrasser
Vous qui viuez au demourant
Se vous voulez bien trespasser
On saduise tart en mourant

Baillif qui scauez quest iustice
Et hault & bas: en mainte guise
Pour gouuerner toute police
Venez tost a ceste assise
Ie vous adiourne de main mise
Pour rendre compte de vos faitz
Au grant iuge qui tout vng prise
Vng chascun portera son fais

He dieu: vecy dure iournee
De ce cop pas ne me gardoye
Or est la cause bien tournee
Entre iuges honneur auoye
Et mort fait raualler ma ioye
Qui ma adiourne sans rappel
Ie ny voy plus ne tour ne voye
Contre la mort na point dappel

Maistre pour vostre regarder
En hault: ne pour vostre clergie
Ne pouez la mort retarder
Cy ne vault rien astrologie
Toute la genealogie
Dadam: qui fut le premier homme
Mort prent. ce dit theologie
Tous fault mourir pour vne pomme

Pour science: ne pour degrez
Ne puis auoir prouision
Car maintenant tous mes regretz
Sont: mourir a confusion
Pour finable conclusion
Ie ne scay rien que plus descrire
Ie pers cy toute aduision
Qui vouldra bien mourir bien viue

Bourgois: hastez vous sans tarder
Vous nauez auoir ne richesse
Qui vous puisse de mort garder
Se des biens dont eustes largesse
Auez bien vse. cest sagesse
Dautrui vient tout: a autrui passe
Fol est qui damasser se blesse
On ne scet pour qui on amasse

Grant mal me fait si tost laisser
Rentes. maisons/ cens/ nourriture
Mais paures. riches abaissier
Tu fais mort: telle est ta nature.
Sage nest pas la creature
Damer trop les biens qui demeurent
Au monde. et sont siens de droicture
Ceulx qui plus ont. plus enuiz meurent

Sire chanoine prebendez
Plus naurez distribution
Ne gros: ne vous y attendez
Prenez cy consolation
Pour toute retribution
Mourir vous conuient sans demeure
Ia ny aurez dilation
La mort vient quon ne garde leure

Cecy guere ne me conforte
Prebende suis en mainte eglise
Or est la mort plus que moy forte
Qui tout emmaine: cest sa guise
Blanc surpelis: aumusse grise
Me fault laisser: et a mort rendre
Que vault gloire si tost bas mise
A bien mourir doit chascun tendre

Marchant regardez par deca
Plusieurs pays auez cherchie
A pie: et a cheual de pieca
Vous nen serez plus empesche
Vecy vostre dernier marche
Il conuient que par cy passez
De tout soing serez despesche
Tel couuoite qui a assez

Iay este a mont et aual
Pour marchander ou ie pouoie
Par long temps: a pie: a cheual
Mais maintenant pers toute ioye
De tout mon pouoir acqueroye
Or ay ie assez mort me contraint
Bon fait aler moyenne voye
Qui trop embrasse peu estraint

Ales marchant sans plus rester
Ne faictes ia cy resistance
Vous ny pouez rien conquester
Vous aussi homme dastinence
Chartreux prenez en pacience
De plus viure nayez memoire
Faictes vous valoir a la danse
Sur tout homme mort a victoire

Ie suis au monde pieca mort
Par quoy de viure ay moins enuie
Ia soit que tout homme craint mort.
Puis que la chair est assouuie
Plaise a dieu que lame rauie
Soit es cieulx apres mon trespas
Cest tout neant de ceste vie
Tel est huy qui demain nest pas

Sergent qui portes celle mace
Il semble que vous rebellez
Pour neant faictes la grimace
Son vous greue si appellez
Vous estes de mort appellez
Qui lui rebelle il se decoit
Les plus fors sont tost rauallez
Il nest fort quaussi fort ne soit.

Moy qui suis royal officier
Comme mose la mort frapper
Ie faisoye mon office hyer
Et elle me vient huy happer
Ie ne scay quelle part eschapper
Ie suis pris deca & dela
Malgre moy me laisse attrapper
Enuiz meurt qui apris ne la

Ha maistre par la passerez
Naiez ia soing de vous deffendre
Plus hommes nespouenteres
Apres moine sans plus attendre
Ou penses vous si fault entendre
Tantost aurez la bouche close
Homme nest fors que vent & cendre
Vie dhomme est moult peu de chose

Iamasse mieulx encore estre
En cloistre & faire mon seruice
Cest vng lieu deuot & bel estre
Or ay ie comme fol et nice
Ou temps passe commis maint vice
De quoy nay fait penitance
Souffisant/ dieu me soit propice
Chacun nest pas ioyeux qui dance

Vsuriers. de sens desrigles
Venez tost. et me regardez
Dusure estes tant aueugles
Que dargent gaigner tout ardez
Mais vous en serez bien lardez
Car ce dieu qui est merueilleux
Na pitie de vous tout perdez
A tout perdre est cop perilleux

Me conuient il si tost mourir
Ce mest grant peine et greuance
Et ne me pourroit secourir
Mon or mon argent ma cheuance
Ie vois mourir la mort mauance
Mais il men desplaist somme toute
Quest ce de male acoustumance
Tel a beaux yeulx qui ne voit goute

Vsure est tant mauuais peche
Come chascun dit: & racompte
Et cest homme qui approche
Se sent de la mort: nen tient conte
Mesme largent: quen ma main compte:
Encor a vsure me preste
Il deura de retour au compte:
Nest pas quite qui doit de reste

Medecin a tout vostre orine
Voyez vous icy quamender
Iadis sceutes de medecine
Assez pour pouoir commander
Or vous vient la mort demander
Comme autre vous conuient mourir
Vous ny pouez contremander
Bon mire est qui se scet guerir

Long temps a quen lart de phisique
Iay mis toute mon estudie
Iauoys science et pratique
Pour guerir mainte maladie
Ie ne scay que ie contredie
Plus ny vault herbe ne racine
Nautre remede quoy quon die
Contre la mort na medecine

Gentil amoureux gent et frique
Qui vous cuidez de grant valeur
Vous estes prins la mort vous pique
Le monde lairez a douleur
Trop lauez ame: cest foleur
Et a mourir peu regarde.
Ia tost vous changeres couleur
Beaute nest que ymage farde

Helas: or ny a il secours
Contre la mort adieu amourettes
Moult tost va ieunesse a decours
Adieu chapeaux boucques florettes
Adieu amans et pucellettes
Souuienne vous de moy souuent
Et vous mires se sages estes
Petite pluye abat grant vent

Aduocat sans long proces faire
Venez vostre cause plaidier
Bien auez sceu les gens attraire
De pieca non pas duy ne dyer
Conseil si ne vous peut aider
Au grant iuge vous fault venir
Sauoir le deuez sans cuider
Bon fait iustice preuenir

Cest bien droit que raison se face
Ne ie ny scay mettre deffence
Contre mort na respit ne grace
Nul nappelle de sa sentence
Iay eu de lautruy quant ie y pense
Dequoy ie doubte estre repris
A craindre est le iour de vengeance
Dieu rendra tout a iuste pris

Menestrier qui dances et notes
Scauez: et auez beau maintien
Pour faire esiouir sos et sotes
Quen dictes vous: alons nous bien
Monstrer vous fault puis que vous tien
Aux autres cy vng tour de dance
Le contredire ny vault rien
Maistre doit monstrer sa science

De danser ainsi neusse cure
Certes tresenuiz ie m'en mesle
Car de mort nest peine plus dure
Iay mis soubz le banc ma vielle
Plus ne corneray sauterelle
Nautre danse. mort men retient
Il me fault obeir a elle
Tel danse a qui au cueur nen tient

Passes cure sans plus songer
Ie sens questes abandonne
Le vif/ le mort solies menger
Mais vous seres aux vers donne
Vous fustes iadis ordonne
Miroer dautruy et exemplaire
De voz fais seres guerdonne
A toute paine est deu salaire

Vueille ou non il fault que me rende
Il nest homme que mort nassaille
De mes parroissiens offrende
Nauray iames: ne funeraille
Deuant le iuge fault que ie aille
Rendre compte las douloureux
Or ay ie grant paour que ne faille
Qui dieu quitte bien est eureux

Laboureur qui en soing & peine
Auez vescu tout vostre temps
Morir fault cest chose certaine
Reculler ny vault ne contemns
De mort deues estre contens
Car de grant soussi vous deliure
Approchez vous ie vous attens
Fol est qui cuide tousiours viure

La mort ay souhaitte souuent
Mais voulentiers ie la fuisse
Iamasse mieulx fist pluye ou vent
Estre es vignes ou ie fouisse
Encor plus grant plaisir y prisse
Car ie pers de paour tous propos
Or nest il qui de ce pas ysse
Au monde na point de repos

Faictes voye vous auez tort
Laboureur apres cordelier
Souuent auez presche de mort
Si vous deuez moins merueiller
Ia ne sen fault esmoy bailler
Il nest si fort que mort nareste
Si fait bon a mourir veiller
A toute heure la mort est preste

Quest ce que de viure en ce monde
Nul homme a seurte ny demeure
Toute vanite y habunde
Puis vient la mort qua tous court seure
Mendicite point ne masseure
Des meffaitz fault payer lamende.
En petit dheure dieu labeure
Sage est le pecheur qui samende

Petit enfant naguere ne
Au monde auras peu de plaisance
A la danse seras mene
Comme autre: car mort a puissance
Sur tous: du iour de sa naissance
Conuient chascun a mort offrir:
Fol est qui nen a congnoissance
Qui plus vit plus a a souffrir

A: a: a: ie ne scay parler
Enfant suis: iay la langue mue
Hyer nasquis huy men fault aler
Ie ne fais quentree & yssue
Rien nay meffait mes de paour sue
Prendre en gre me fault cest le mieulx
Lordonnance dieu ne se mue
Aussi tost meurt ieune que vieux

Cuidez vous de mort eschapper
Clerc esperdu pour reculer
Il ne sen fault ia defripper
Tel cuide souuent hault aller
Quon voit acop tost raualler
Prenez en gre allons ensemble
Car rien ny vault le rebeller
Dieu punist tout quant bon lui semble

Fault il qun ieune clerc seruant
Qui en seruice prent plaisir
Pour cuider venir en auant
Meure si tost: cest desplaisir
Ie suis quitte de plus choisir
Autre estat: il fault quansi danse
La mort ma pris a son loisir
Moult remaint de ce que fol pense

Clerc: point ne fault faire refus
De danser: faicte vous valoir
Vous nestes pas seul: leues sus
Pourtant moins vous en doit chaloir
Venez apres cest mon vouloir
Homme nourry en hermitage
Ia ne vous en conuient doloir
Vie nest pas seur heritage

Pour vie dure ou solitaire
Mort ne donne de viure espace
Chascun le voit si sen fault taire
Or requier dieu qun don me face
Cest que tous mes peches efface
Bien suis content de tous ses biens
Desquelz iay vse de sa grace
Qui na suffisance il na riens

Cest bien dit ainsi doit on dire
Il nest qui soit de mort deliure
qui mal Vit il aura du pire
si pense chascun de bien viure
dieu pesera tout a la liure
bon y fait penser soir et main
Meilleur science na en liure
Il nest qui ait point de demain